“E Dodonu Beka Meu Toki?”

¹ Ena nodra rogoca na ivakaro i Jisu mera “lako yani ka qisi ira me ra noqu tisaipeli na lewe ni veivanua kece ga,” e levu gona kina na tamata yalayala i Jiova era toki mera lai veiqaravi ena vanua e gadrevi vakalevu kina mera cakacaka. (Maciu 28:19, VV) Era vakatotomuri Paula ena nona rogoca na kaci: “Lako mai ki Masitonia, mo vukei keimami.” (Caka. 16:9) Ena caka vakacava?

² Vakasamataka Vakamalua na Ka me Caka: E tiko beka na yalava e dau cakacakataki vakavudua ena nomu ivavakoso? Ke vaka kina, de vinaka mo saga mo cakacaka ena vanua oya. Ni bera ni o vakatulewataka mo gole ina dua tale na vanua, tarogi iratou na qase se ganiti iko mo toki. E rawa tale ga ni o taroga na ivakatawa ni tabacakacaka de kila e dua na ivavakoso voleka o rawa ni lai vakarabailevutaka kina na nomu cakacaka vakaitalatala. Ena yasana adua, ni o sa vakasamataka oti vakavinaka, o na rairai vakasamataka mo lai veivuke ena dua tale na yalava, se ena dua tale na vanua. Ke sa lomamu dina, mo qai volavola kei iratou na nomu ilawalawa qase ina valenivolavola ni tabana ni vanua o taleitaka mo lai veiqaravi kina, me vakamacalataki tale ga kina na kemu ituvaki vakayalo. De vinaka mo sikova mada na vanua oya ni bera ni o qai vakatulewataka mo toki kina vakadua se kua.

³ Qarauna Nomu Via Curuvanua: Dua na iwiliwili levu ni mataveitacini era biu vanua baleta nira vaqara bula e vinaka cake se mera galala mai na veivakararawataki. Ena nodra vakayacora oqo, e so vei ira era sikalutu ina nodra vosa ni veirawai na tani ena nodra yalataka nira na vukei ira nira sa toki yani ina nodra vanua vou, ia era dau taura ga na nodra ilavo ra qai guilecavi ira. So na gauna o ira na tamata vaka oqo era vakasaurarataki ira na curuvanua yani mera cakava na itovo vakasisila. Nira bese, sa na qai vakatau sara ga ina matanitu era sa lai lewena na ka me na caka vei ira. O koya gona, sa qai ca vakalevu na ituvaki era lai sotava mai na nodra tiko ga ena nodra vanua dina. Era tini kerei ira sara na mataveitacini e kea mera lai vakaicili vei ira se ra kerea na nodra veivuke, ra qai lai vakalevu icolacola vei ira na vuvale vakarisito sa tu rawa tu na nodra leqa. Era lai duitutu sara kina e so na matavuvale ra qai malumalumu tale ga vakayalo ena so na vakatulewa cala vaka oqo.​—1 Tim. 6:8-​11.

⁴ Ke o via toki ena vuku ga ni nomu via rawaka vakaitaukei, mo nanuma tiko se e vei ga na vanua eda bula kina eda na sotava ga na leqa. Ia ena rawarawa cake na wali ni leqa ena vanua eda kila na kena vosa kei na kena itovo, mai na noda lai tauyavu vou ena dua na vanua eda sega sara tu ga ni bau kila.