Vunau Tiko Ga!
1 E loma ni Kalou mera “bula na tamata kecega, ka mai kila sara nai vakavuvuli dina.” (1 Tim. 2:4) O koya gona, e vakacolata kina vei keda na ilesilesi oqo meda vunautaka na itukutuku vinaka. (Maciu 24:14) Kevaka eda raica rawa na vuna e dodonu meda vunau tiko ga kina, ena sega ni vakamalumalumutaki keda na veivakayalolailaitaki se na cava tale e vakalatilati e matada me vakamuai keda tani.
2 Na Cava Meda Kua ni Soro Kina? E levu sara na veika e tu ena vuravura e rawa ni vakamua tani na tamata, e vakavuna kina mera guilecava se mera vakamamadataka ga na lewenivanua na ka eda tukuna vei ira. Ena vinakati gona kina meda tukuna tiko ga vei ira na itukutuku ni veivakabulai ni Kalou. (Maciu 24:38, 39) Kena ikuri, e dau veiveisau tu ga na ivakarau ni nodra bula. Na ituvaki mada ga ni veika e dau yaco e vuravura e rawa ni veisau ena dua ga na bogi. (1 Kor. 7:31) O ira eda sa vunau oti vei ira era na rairai sotava e so na leqa se so na ka e rawa ni vakavuna na lomanuiqawaqawa nimataka, se ena macawa beka mai oqo, se vula mai oqo e rawa ni vakavuna mera vakasamataka vakabibi kina na itukutuku vinaka eda lai tukuna tiko vei ira. E sega ni vakabekataki ni o na vakavinavinakataka na nona a sega ni soro na iVakadinadina a mai tukuna vei iko na ka dina, se vakaevei?
3 Mo Yalololoma Tale ga Vakataki Jiova: Na yalovosovoso e tu vei Jiova e vakatara tu mai kina na toso ni gauna ni bera ni na qai vakarusai ira na ivalavala ca. E vakayagataki keda gona meda vakamasuti ira tiko ga na tamata e vinaka na lomadra mera veivutuni mera bula. (2 Pita 3:9) Ena tarogi vei keda na nodra dra kevaka eda sega ni kacivaka tiko na itukutuku vakayalololoma ni Kalou da qai vakasalataki ira tale ga me baleta na veivakarusai ni Kalou ena tau vei ira era sega ni veivutunitaka na nodra itovo ca. (Isik. 33:1-11) E dina ni sega soti ni dau taleitaki na noda vunau, ia me kua vakadua ni luluqa na noda sasaga nida vukei ira na lomadina mera ciqoma na nona yalololoma levu na Kalou.—Caka. 20:26, 27; Roma 12:11.
4 Vakaraitaka na Noda Loloma: E vakayagataki Jisu Karisito na Kalou o Jiova me vakaroti keda meda vunautaka na itukutuku vinaka e vuravura raraba. (Maciu 28:19, 20) Ke ra bese mada ga ni vakarorogo, oqo e dua na sala eda vakaraitaka kina vua na Kalou na noda lomani koya kei na noda yalodina ena noda sega ni soro na cakava tiko ga na ka e dodonu.—1 Joni 5:3.
5 Meda vakadeitaka mada ga e lomada meda na vunau tiko ga! Meda makututaka tiko mada ga ni sa donui keda tiko oqo na “siga ni veivakabulai” i Jiova.—2 Kor. 6:2, VV.