Na Cava Meda Vunau Tiko ga Kina?

¹ De dua, sa dede sara na vunautaki tiko ni Matanitu ni Kalou ena vanua o vakaitikotiko kina. (Maciu 24:14, VV) Ke vaka kina, e sa na rairai tarai oti kece na yalava ni ivavakoso. Ni o lai vunau ena gauna oqo, de dua o na sotava e vuqa era sa sega ni kauai ena itukutuku ni Matanitu ni Kalou. Ke mani vaka kina, raica mada na ka eratou vakadinata na tisaipeli i Jisu ena taqana 141 ni ivola Isaiah’s Prophecy II: “Ena so na vanua, ena vaka e sega sara ga ni vakilai na yaga ni nodra cakacaka ni laurai vata kei na nodra sasaga. Ia era vosota tiko ga.” Ena vuku ni cava meda vunau tiko ga kina?

² Nanumi Jeremaia: Se ra vakarorogo se sega na lewenivanua, o keda meda vunau tiko ga. A vunau o Jeremaia ena 40 na yabaki ena dua tiko ga na yalava, e lewe lailai ga era vakarorogo ni vakatauvatani kei na le vuqa era saqata na nona itukutuku. Na cava e sega ni soro kina o Jeremaia? Na vuna, ni cakava tiko na cakacaka e vakaroti koya kina na Kalou, kei na nona kila tale ga na ka ena yaco ena gauna mai muri.​—Jere. 1:17; 20:9.

³ E tautauvata sara ga kei na keda ituvaki. O Jisu a “vakarota vei keitou me keitou vunau vei ira na tamata, ka vakadinadina ni sai koya ga ka lesia eliu na Kalou me lewai ira na bula kei ira na mate.” (Caka. 10:42) Na itukutuku eda kauta tiko ena vakatau kina nodra bula se mate o ira na vakarorogo. Era na lewai na tamata ena ivalavala ni nodra ciqoma na itukutuku vinaka. E dodonu gona kina meda cakava sara ga na ka e vakaroti vei keda. Kevaka mada ga era sega ni vakarorogo, sa na qai laurai dina kina na titobu ni noda lomani ira kei na noda yalodina vei Jiova ena noda cakava tiko ga na cakacaka oqo. E sega ni o koya wale ga oya.

⁴ E Yaga Noda Vunau Tiko Ga: Ke ra vakarorogo se sega meda cakava tiko ga na loma ni Kalou, oqo ena solia vei keda na lomavakacegu kei na marau e kunekunei dredre. (Same 40:8) Ena vakainaki tale ga kina noda bula. Na noda vakaitavi wasoma ena cakacaka vakavunau ena dei ga kina e lomada kei na noda vakasama na inuinui me baleta na bula ena vuravura vou ni Kalou. Noda vakananuma na inuinui totoka vaka oqo era koto ena iVolatabu ena vakalevutaka na noda kila qai vaqaqacotaka tale ga na noda veiwekani kei Jiova.

⁵ Kevaka eda raica ni sega ni vua na noda cakacaka vakavunau, na sorenikau ni ka dina e tei ena loma ni tamata yadua ena qai vakatubura ga o Jiova ena kena gauna. (Joni 6:44; 1 Kor. 3:6) Ena vuku ni nodra gumatua na tamata i Jiova, ena sega kina ni dua e kila na levu ni tamata era na mai vulica na Matanitu ni Kalou ena noda vanua se veivanua tale e so.

⁶ E gadrevi sara ga ena gauna oqo meda muria na ivakasala i Jisu: “Dou qarauni kemudou vinaka; dou vakatawa, ka masu: ni dou sa sega ni kila na kena siga. Ia na ka ka’u sa kaya vei kemudou, ka’u sa kaya vei ira kecega, Dou vakatawa.” (Mari. 13:33, 37) Meda kacivaka tiko ga na Matanitu ni Kalou da qai vakacerecerea na yacana tabu ni oqori ena vakamarautaka na loma i Jiova.