Lesuvi Ira na Taleitaka na iTukutuku ni Matanitu Naba 36
1 O sa veisoliyaka kece na nomu iokaoka ni iTukutuku ni Matanitu Naba 36? E tarogi tiko kina na taro veiganiti meda vakasamataka vakabibi: “Na Yabakiudolu Vou—Na Cava Ena Kauta Mai Vei Iko?” Ni roro tiko mai na yabaki 2000, dua na ka na levu ni nanamaki ena ka ena kauta mai na yabakiudolu vou oqo. E vakamacalataki ena iTukutuku ni Matanitu Naba 36 e so na ka meda namaka, qai vakaraitaka tale ga vei keda ni ka e yaco tu e vuravura e sega kina na vakanuinui vinaka ina veigauna sa tu mai liu. Na yabakiudolu ga ena kauta mai na vakacegu kei na sautu era vaqara tu e levu, oya na Duanaudolu na Yabaki ni Veiliutaki i Karisito Jisu. Na noda vakabauta na dina ni nona Matanitu e uqeti keda meda veisoliyaka kina na iTukutuku ni Matanitu Naba 36 vei ira kece eda rawata.
2 So na Ka e Tukuni me Baleta na iTukutuku ni Matanitu: Na veisoliyaki ni iTukutuku ni Matanitu sa oti e vakadinadinataki kina na veiuqeti ni noda cakacaka. Me baleta na iTukutuku ni Matanitu Naba 35, e vola kina na valenitabana mai Canada: “Era gumatua ni tokona na cakacaka lavotaki oqo o ira na dautukutuku kei ira na painia, ra qai marautaka na vakasavuirogorogo veivakauqeti era sotava.” Sega ni vakabekataki ni o a gu tale ga na veisoliyaka na iTukutuku ni Matanitu Naba 36.
3 E tuvanaki me na cava tiko na veisoliyaki ni iTukutuku ni Matanitu ena 17 Noveba, 2000. Sa tarai kece beka na yalava ena nomuni ivavakoso? Ke se bera, era na rairai kerei keda na qase me se tomani tiko ga me yacova na iotioti ni macawa ni Noveba.
4 Na cava sa bau rawati ena veisoliyaki ni iTukutuku ni Matanitu Naba 36 ena nomuni yalava? E so era na vakalewena na fomu ni kerekere me dua nodra ilavelave ni brochure na Loma ni Kalou, se so sara era na vinakata tale ga mera vuli iVolatabu. Ia, e levu era a taleitaka na veitalanoataki ni yabakiudolu era wele ga me yacova ni lesu tale e dua na iVakadinadina i Jiova. Mera sikovi o ira kece era tataleitaki. Na gauna cava beka e gauna vinaka mera lesuvi kina? Na kena totolo ga na kena vinaka.
5 Vakasamataka mada na vakasavuirogorogo oqo nira lesuvi o ira a soli vei ira na iTukutuku ni Matanitu Naba 35. E dua na painia mai Ailadi a solia e dua na iTukutuku ni Matanitu vua e dua na itaukei ni valenikana. E drukataka na marama oya na itukutuku e wilika kina mani sureta na tacida yalewa oqo me lesu tale yani. A lesu tale na tacida yalewa ena loma ni rua na siga, tekivu sara na vuli iVolatabu. Mai Denmark, a biu na iTukutuku ni Matanitu ena dua na vale e lala. Ena siga tiko ga oya a vakauta kina na fomu ina valenivolavola ni tabana e kea na marama itaukeinivale, qai vakauta na valenivolavola ni tabana ina ivavakoso volekata na nona itikotiko na marama oqo. Ena macawa tiko ga oya, rau lai raica na marama oqo e rua na tacida yalewa, tuvanaki na vuli i Volatabu, mani tiko sara ena soqoni ena imatai ni gauna ena Kingdom Hall!
6 Na Cava Mo Kaya ni O Lesu: Na noda veisikovi lesu vei ira yadua eda solia vei ira na iTukutuku ni Matanitu e rawarawa sara qai tiki marautaki ni noda cakacaka vakaitalatala. Ni o sa lesu, e vinaka mo kauta tiko e dua na ilavelave ni iTukutuku ni Matanitu Naba 36, de sa yali na ilavelave nei itaukeinivale. O rawa ni tovolea na iwalewale oqo.
7 Ni o vakamacalataki iko tale vei itaukeinivale, o rawa ni kaya:
◼ “Au a solia toka vei kemuni na ivolacebaceba e kena ulutaga ‘Na Yabakiudolu Vou—Na Cava Ena Kauta Mai Vei Iko?’ E sega li ni veivakayaloqaqataki nida wilika kina ni sa voleka ni tekivu na Duanaudolu na Yabaki ni Veiliutaki i Karisito Jisu, me qai tauyavutaka e vuravura na Parataisi? [Vakaraitaka na iyaloyalo ni Parataisi ena iTukutuku ni Matanitu Naba 36.] E dakuna, oni sureti mo ni vakalewena na fomu ni kerekere me dua na nomuni ilavelave ni brochure Na Cava e Loma ni Kalou vei Keda?” Vakaraitaka na brochure, cega na lesoni 5, wilika na imatai ni taro kei na parakaravu 1 kei na 2, qai tarogi itaukeinivale se cava e nanuma kina. Wilika qai vakamacalataka e dua se rua na tikinivolatabu. Ke rawa, taroga e dua tale na taro qai wilika e dua tale na parakaravu, tuvanaka mo na lesu tale me lai tomani na veivosaki.
8 Ni na soli tiko ena Noveba na brochure na “Loma ni Kalou” se na ivola na “Kila,” o rawa ni kaya:
◼ “Noqu veisiko se qai oti ga oqo, au a solia toka vei kemuni e dua na ilavelave ni ivolacebaceba ‘Na Yabakiudolu Vou—Na Cava Ena Kauta Mai Vei Iko?’ E tiko kina e dua na veisureti ni vuli iVolatabu wale qai caka sara ga e nomuni vale. Au lesu mai oqo meu mai vakaraitaka vei kemuni na ivola keimami dau vakayagataka ena vuli. [Vakaraitaka na Loma ni Kalou, qai vakaraitaka sara na dakuna; se vakaraitaka na ivola na Kila, qai cega na taqana 188-9.] Na Yabakiudolu e tukuni ena iVolatabu ena kauta mai na ituvaki oni raica toka ena iyaloyalo oqo. Meda bula ena Parataisi, ena gadrevi vei keda meda vulica na ka dina me baleta na Kalou. Meu vakaraitaka mada ga vakalekaleka vei kemuni na icakacaka ni vuli iVolatabu.”
9 Na veisoliyaki ni iTukutuku ni Matanitu Naba 36 e sega wale ga ni uqeti keda meda vakalevutaka na noda cakacaka vakaitalatala, yaco tale ga me ivakadinadina vinaka. Na ka oqo e rairai uqeta na nodra tataleitaki e levu ena noda yalava. Noda saga ena duavata meda lesuvi ira na tataleitaki, salavata na veivuke i Jiova, eda na marautaka kina na noda vaqarai ira tiko era vaka na sipi.—Maciu 10:11; Caka. 13:48, 49, 52.