“Na Yabakiudolu Vou—Na Cava Ena Kauta Mai Vei Iko?”
1 Era vakasamataka tu na taro oqo na tamata ena vuravura raraba. E dina ni levu sara na ka sa cakava rawa na tamata ena vica na itabagauna sa oti, ia era se sega ga ni lomavakacegu baleta ni se yaco tu ga na leqa e sa vakararawataki ira tu mai me vica na udolu na yabaki. (Jope 14:1; Same 90:10) Era na kunea e vei na vakacegu?
2 Na vula o Okotova kei na Noveba erau vula bibi meda na sauma kina vei ira na wekada na isau ni nodra taro. Ena sala cava? Ena noda veisoliyaka na iTukutuku ni Matanitu Naba 36. Na kena ulutaga “Na Yabakiudolu Vou—Na Cava Ena Kauta Mai Vei Iko?” Ena imatai ni veimama ni vula o Okotova, eda na solia tiko kina Na Vale ni Vakatawa kei na Yadra! Ia ena siga Moniti, 16 Okotova ina Vakaraubuka, 17 Noveba, eda na veisoliyaka kina na iTukutuku ni Matanitu Naba 36. E cakacaka bibi oqo, eda na solia kina na iTukutuku ni Matanitu Naba 36 ena lomanimacawa. Ia ena muanimacawa, eda na solia vata tiko kei na ivoladraudrau vovou.
3 O na Guta Beka na Cakacaka Oqo? Me vaka nira dau liutaka na cakacaka vakavunau o ira na qase, o ira na dauveiqaravi vakaitalatala, kei ira na painia, ena vaka tale ga kina na nodra liutaka sara ga na cakacaka lavotaki oqo. E levu vei ira na dautukutuku era veisautaka na nodra ituvatuva me rawa nira painia ena dua se vula ruarua ni cakacaka lavotaki oqo. E so tale era tuvanaka mera vakaitavi vakalevu cake ena cakacaka vakavunau mai na kena e sa dau matau tu vei ira.
4 O ira na qasenivuli ni Vulivola ni iVavakoso e rawa nira vakayaloqaqataki ira yadua na lewe ni nodra iwasewase mera gu vakalevu ena nodra veisoliyaka na iTukutuku ni Matanitu Naba 36. De so na dautukutuku era sa mate tu. Mera sikovi ira na qase ra qai raica se cava me caka mera vukei kina. E rawa ni tuvanaki mera salavata na dautukutuku mate kei ira na dautukutuku matua ena loma ni rua na vula oqo. E rawarawa sara na soli ni iTukutuku ni Matanitu Naba 36 qai ka sara ga e gadrevi mera vakabulabulataki tale kina o ira na dautukutuku oqo.
5 Oqo e gauna vinaka mera vakaitavi tale ga kina ena cakacaka vakavunau o ira na vuli iVolatabu sa ra voleka ni vakaotia na ivola na Kila, qai ganiti ira mera dautukutuku bera ni papitaiso. E rawa tale ga nira vakaitavi ena cakacaka vinaka oqo o ira na lalai.
6 Gadrevi e dua ga na iwalewale rawarawa. E rawa ni o kaya:
◼ “Au sega ni saumi ena cakacaka bibi au cakava tiko ena kena veisoliyaki na itukutuku bibi oqo vei kemuni kece na vuvale ena [tukuna na yaca ni itikotiko]. Oqo na nomuni ilavelave. Yalovinaka mo ni qai wilika toka.” De vinaka mo kua ni kauta na nomu kato ni vunau ena gauna e veisoliyaki tiko kina na iTukutuku ni Matanitu Naba 36.
7 Me Tuvanaki Vinaka na Soqoni ni Cakacaka Vakavunau: Mera raica na qase me rawarawa qai yaga na ituvatuva ni cakacaka vakavunau. Vakabibi na ivakatawa ni cakacaka me vakadeitaka ni levu na vale ena yalava ni vunau vaka kina ena yalava ni bisinisi me rawa nira vakaitavi kece kina na dautukutuku ena cakacaka vakavunau ena kena levu e rawa. Se vanua cava ga, e dodonu me tuvanaki na soqoni ni vunau ena veisiga, ena muanimacawa, ena veiyakavi tale ga. Rawa tale ga ni tuvanaki me dau caka na sota ena yakavi bogi baleti ira na gonevuli, o ira era dau veisau yadra ena nodra cakacaka, kei na so tale.
8 Vakacava ke Lala na Vale: Me noda isausau meda vosa vei ira e levu na itaukeinivale ena kena levu ga eda rawata. Ke lala na vale, vola na kena naba qai lesuva ena dua tale na gauna. Kevaka sa donuya na iotioti ni macawa ni cakacaka lavotaki, ia drau se sega tiko ga ni sota kei itaukeinivale, e rawa ni o biuta e dua na ilavelave ni iTukutuku ni Matanitu Naba 36 e ruku ni katuba me kua ni laurai mai tuba. Mera vakamacalataka na qase ina ivavakoso ni gauna e tarai kina na yalava e taudaku ni koro vakavalagi qai levu na yalava e se vo tu me tarai, ena rawa ni biu na ilavelave ni iTukutuku ni Matanitu Naba 36 ena imatai ga ni gauna eda donumaka kina na vale e lala tu.
9 Meda Ogaoga Tiko Ga! Mera saga na ivavakoso yadua mera tara na nodra yalava kece ni bera ni cava na cakacaka lavotaki oqo ena 17 Noveba. Ke rui levu na nomudou yalava, era rawa ni cakacaka duadua e so na dautukutuku ena vanua veiganiti e sega ni rawa ni yaco kina na leqa. Ena sala oqo ena rawarawa meda na tarai ira kina e levu e yaga vei ira na itukutuku oqo ena kena levu ga eda rawata. Nanuma me volai vinaka na kedra itukutuku na tataleitaki.
10 Mera vakasamataka taumada na qase na levu ni ivoladraudrau ena ganita na ivavakoso, mera otataka sara. Me kua ni otataki na iTukutuku ni Matanitu Naba 36 ni na vakau ga yani ina ivavakoso yadua na nomuni okaoka. O ira na painia lavotaki, na painia tudei, kei ira na painia veivuke era na ya250 na ilavelave mera solia, o ira na dautukutuku ni ivavakoso yadua era na ya50. O sa tu vakarau mo na gu vakalevu ena cakacaka marautaki oqo? E itavi dokai dina meda tukuna vei ira na wekada mera kila na ka e yalataka tu na Kalou me baleta na gauna se bera mai!