Vakarokorokotaki o Jiova ena iValavala Vinaka
1 Ni o sotava e dua na draki ca levu, dua na ka nomu lomavakacegu ni o kunea na vanua mo vakaruru kina! Ke katakata vinaka na vanua oya, o tiko vinaka e loma, ra veikauaitaki tale ga na kena itaukei, o taleitaka sara ga na nomu tiko e kea. Na vunautaki ni itukutuku vinaka ni Matanitu ni Kalou e veidusimaki ina dua na ivakaruru, e duatani sara mai na ituvaki i Setani. Era na uqeti beka mera mai vakaruru tale ga vakavinaka ena noda ivakaruru nira raica na noda itovo vinaka e veisiga? Io, e kaya o Jisu mera ‘raica na noda ivalavala vinaka, ra qai vakarokorokotaka na Tamada sa tiko mai lomalagi.’—Maciu 5:16.
2 Me vakacava na noda itovo kei na ka eda cakava me na dreti ira kina vei Jiova kei na nona isoqosoqo? Ena noda saga me moica noda bula e veisiga na vosa i Jisu ena Luke 6:31 kei na 10:27. Ena uqeti keda kina meda kauaitaki ira vakayalololoma na tani, e vakaduiduitaki keda tale ga mai na vuravura ni dui cakanona oqo.
3 E dua na tacida yalewa e raica e dua na tinanigone ni loloa vakalevu, qai sega ni qaravi luvena vinaka e loma ni waqa. E mani lomasoli na tacida oqo me raica na gone. Ni tukuna o tinanigone ni sega vua na ka me vakavinavinakataki koya kina, e tukuna ga vua na tacida: ‘Yalovinaka, ni qai ciqomi ira ga na iVakadinadina i Jiova nira veisiko tale yani.’ A mani muria na marama oya, nikua rau sa iVakadinadina vakaveiwatini. Na ivalavala vinaka gona e uqeti ira na tani mera rogoca na itukutuku ni Matanitu ni Kalou.
4 Okati Kina na Veibasoga Kece ni Noda Bula: Na noda itovo ena noda itikotiko, e vanua ni cakacaka, se e koronivuli, kei na gauna ni noda dau veilasamaki, ena boroya e dua na iyaloyalo me baleti keda kei na noda lotu vei ira na tani. O koya gona, meda tarogi keda: ‘Na cava beka nodra nanuma me baleta noqu vuvale? Era raica beka na neitou vale kei na neitou lomanibai o ira keimami tiko veitikivi ni savasava qai maqosa? Era raici keda o ira eda vuli vata, vaka kina o ira eda cakacaka vata nida dau gugumatua da qai dau yaco totolo yani i koronivuli, vaka kina i noda vanua ni cakacaka? Era raica beka na keda irairai kei na noda isulusulu ni maqosa qai rakorako?’ Na noda ivalavala vinaka sara ga oqo era na taleitaka kina na sokalou vei Jiova.
5 E veivakasalataki o Pita nira na vosa vakacacataki na lotu Vakarisito. (1 Pita 4:4) Meda qarauna me kua ni vu ni vosa ni veivakacacani na noda itovo. (1 Pita 2:12) Ke vakarokorokotaki na Kalou eda qarava ena vuku ni noda ivalavala vinaka e veisiga, eda na vaka na cina ena vanua cecere, nida na dreti ira na tani mera mai vakaruru tale ga vakavinaka ena ivakaruru e vakarautaka o Jiova.—Maciu 5:14-16.