“Sa Rawarawa Vua na Kalou na Ka Kecega”

¹ Na vunautaki ni itukutuku ni Matanitu ni Kalou e vuravura taucoko e cakacaka bibi duadua ni ivavakoso vakarisito. (Maciu 24:14) Sa bau cakacaka vakaitamera dina. Era nanuma e levu na dau vakaraici keda ni sega vei keda na iyaya ni cakacaka meda cakava rawa kina na itavi oqo. So tale era sega ni vakasamataka rawa se da rawata tu vakacava na cakacaka oqo nida dau vakalialiai kina, tusaqati, qai vakacacani. (Maciu 24:9; 2 Tim. 3:12) Nodra rai na dau vakatitiqa ni sa bau dredre dina me na rawati na cakacaka oqo. Ia, e kaya o Jisu: “Sa rawarawa vua na Kalou na ka kecega.”​—Maciu 19:26.

² iVakaraitaki Vinaka Meda Vakatotomuria: Ena nona se qai tekivu cakacaka vakaitalatala o Jisu, a cakacaka duadua voli ga. Era saga na dau veitusaqati mera tarova na nona cakacaka, ra vakamadualaki koya vakaca, ra tini vakamatei koya sara vakararawa. Ia ni sa lai tini na nona bula, e kaya ena doudou o Jisu: “Au sa vakamalumalumutaki vuravura.” (Joni 16:33) Sa dua na qaqa vakaitamera!

³ Eratou vakaraitaka na tisaipeli i Jisu na yalodoudou kei na yalogu vata ga oya ena cakacaka vakaitalatala vakarisito. Eratou warolaki, mokulaki, bala i valeniveivesu, tini vakamatei sara. Ia, eratou “reki ni ratou sa yaga me ratou vakacacani e na vuku ni yacana.” (Caka. 5:41) E dina ni ratou sotava na ka dredre, eratou rawata vinaka ga na itavi bibi me vunautaki na itukutuku vinaka me “yacova nai yalayala kei vuravura.”​—Caka. 1:8; Kolo. 1:23.

⁴ Eda Rawata ena Noda Gauna: O keda tale ga eda gutaka na vunautaki ni itukutuku ni Matanitu ni Kalou dina ga nida sotava na ituvaki dredre. E dina ni vakatabui na noda cakacaka, da sotava na veivakacacani, bala i valeniveivesu, kei na so tale na ivalavala kaukaua me tarovi kina na noda cakacaka, eda rawata vinaka ga na cakacaka oqo. Eda rawata vakacava? “Sa segai e na qaqa, se na kaukauwa, e na Yaloqu ga, sa kaya ko Jiova ni lewe vuqa.” (Saka. 4:6) Ni tokoni keda o Jiova, sega ni dua na ka ena tarova na noda cakacaka!​—Roma 8:31.

⁵ Nida vunau, e sega ni dua na vuna meda madua kina, rere, se da nanuma ni tawayaga na noda cakacaka. (2 Kor. 2:16, 17) Ia e levu tu na vuna meda toso tiko ga kina i liu nida vakatetea voli na itukutuku vinaka ni Matanitu ni Kalou. Ena veivuke i Jiova, eda na rawata kina na veika “dredre”!​—Luke 18:27.