Porokaramu Vou ni Siga ni Soqo Lavotaki

Na usutu ni porokaramu ni siga ni soqo lavotaki ena yabaki vou vakacakacaka oqo e yavutaki dei vakaivolatabu: “Vakamalumalumutaki Kemudou Vua na Kalou​—Vorata na Tevoro.” (Jeme. 4:7) Sa bau idusidusi yaga ena gauna dredre oqo! Na noda talairawarawa gona ina ivakaro ni Kalou, e coqai keda tiko kina o Setani. Na porokaramu oqo ena vakavulici keda ena sala meda tudei tiko kina, me kua ni vakamalumalumutaka na noda vakabauta na ivadi ca i Setani. Na cava e so na iyau talei vakayalo eda na rogoca tiko ena soqo oqo?

Ena vosa na ivakatawa ni tabacakacaka ena ulutaga “Vakaraitaka na Yalomalumalumu Vakalou ena Vuvale” e vakaukauataka na vuvale me vorata na idre kei vuravura. Na imatai ni ivunau ni mata mai na valenitabana, “Noda Vorata na Tevoro,” ena vakamacalataka kina na cava na vuna kei na sala meda vakaukaua tiko kina meda na vorata na sasaga i Setani me vakacacana na noda bula vakayalo. E rua na ivunau e vakamuai vakatabakidua vei ira na itabagone, e dodonu tale ga mera yadrava tiko na ivadi i Setani. Levu na lotu Vakarisito sa ra qase ena gauna oqo era a bese ni muria na gagadre ni vuravura ena gauna ni nodra gone. Eda na marau ni rogoca e so na nodra vakasavuirogorogo.

E gadrevi vei keda kece meda talairawarawa vei ira na veiliutaki. Na iotioti gona ni nona ivunau na mata mai na valenitabana ena vakabibitaka e va na vanua e dodonu meda vakaraitaka kina na noda yalomalumalumu vakalou: (1) ina matanitu, (2) ena ivavakoso, (3) vanua ni noda cakacaka, kei na (4) noda vuvale. Sa dua dina na porokaramu yaga!

O ira kece na via papitaiso ena siga ni soqo lavotaki ena gadrevi mera vakaraitaka vua na ivakatawa daulewa ena dua na gauna totolo. Meda vakatakilakilataka na kena tikinisiga ena noda ivolanivula da qai lalawataka rawa meda na tiko ena porokaramu kece ni soqo oqo. Ena tawamudu na veivakalougatataki eda na sotava nida vakamalumalumutaki keda tiko ga vei Jiova.