‘Veivakani ena Kena Gauna Donu’
1. E yaga vakacava vei iko kei ira tale na so na porokaramu ni siga ni soqo lavotaki sa oti?
1 Eda dau tukuna ni oti na siga ni soqo lavotaki: “Sa yaco sara ga mai ena gauna donu!” Nira rogoca na porokaramu ni siga ni soqo lavotaki sa oti, e kaya e dua na ivakatawa ni tabacakacaka nira via vakalevutaka sara ga na nodra cakacaka vakaitalatala eso ena tabacakacaka e qarava. E kaya e dua na ivakatawa dauveilakoyaki: “Keimami uqeti me keimami vakasamataka vakabibi na gauna keimami sa donuya tu, me keimami nanuma matua tiko qori ena vakatulewa keimami cakava e veisiga.” E tukuna e dua tale: “Era kaya e levu na dautukutuku ni vaka e vakayadrati ira mera vakadeitaka kina nira vakaliuca tiko na ka bibi duadua, oya na cakacaka vakaitalatala.” A yaga vakacava vei iko na siga ni soqo lavotaki sa oti?
2. Na cava ena veivosakitaki ena porokaramu ni yabaki vakacakacaka mai qo?
2 E yaco tale ga mai ena kena gauna donu na porokaramu ni yabaki vakacakacaka mai qo. Na kena usutu: “Vakararavi Vei Jiova” e yavutaki ena Same 118:8, 9. Qo eso tale na ulutaga ena veivosakitaki kina: “O Jiova e Noda iDrodro ena Gauna ni Leqa,” “Vukea Eso Mera Vakaruru ena Ruku ni Tabai Jiova,” “Meda Dauveivakacegui me Vakataki Jiova,” “Ra iTabagone, Moni Nuitaki Jiova!” kei “Na Noda Parataisi Vakayalo—Na iDrodro e Vakarautaka o Jiova.”
3. Na cava meda cakava me yaga vakalevu kina na noda tiko ena soqo?
3 Ka mo Cakava: Ni kacivaki oti ga na tikinisiga, nakita dei sara mo kua ni calata, sureti ira tale ga na nomu vuli iVolatabu mera tiko kina. Ke da taura dei na ka eda rogoca, eda na ‘vosota nida vua tiko.’ (Luke 8:15) Meda vakarorogo vinaka sara ena porokaramu, da vola vakalekaleka ga na veitikina bibi kei na lesoni meda bulataka se vakayagataka ena noda cakacaka vakaitalatala. Ni oti na soqo, meda veivosakitaka vakavuvale na porokaramu kei na sala meda bulataka kina.
4. Na cava meda vakanamata kina ena siga ni soqo lavotaki e tarava?
4 Me vaka ga na vakarautaki ni dua na kakana maleka qai bulabula, na siga ni soqo lavotaki ena yabaki vakacakacaka mai qo e vakarautaki tale ga vakavinaka, qai laurai votu kina nida lomani vakalevu. Me vakalougatataka mada ga o Jiova na noda sasaga meda tiko ena soqo, me yaga tale ga vei keda na ‘veivakani qo ena kena gauna donu’ meda vakabulabulataki kina vakayalo na italatala i Karisito.—Maciu 24:45.