Porokaramu Vou ni Siga ni Soqo Lavotaki
1 E dina nira vakabekabea na vutuniyau vakayago o ira na dau vakauitukutuku kei ira na iliuliu ni vuli, ia e uqeti keda na Vosa ni Kalou meda “Vutuniyau ena Cakacaka Vinaka.” (1 Tim. 6:18, VV) Oqori na usutu ni porokaramu ena siga ni soqo lavotaki me tekivu ena Sepiteba 2002. Na ka ni veivakaukauataki cava eda na vulica mai ena soqo oqo?
2 Ena vakamacalataka na ivakatawa ni tabacakacaka na ibalebale ni “Vutuniyau Mai na Rai ni Kalou,” kei na nodra vakatarogi e so era saga tiko vagumatua mera vutuniyau vakayalo. Ena vakaraitaka ena imatai ni nona vosa ena siga oya na mata mai na valenitabana na nodra “Cakacaka Vinaka ena Gauna Oqo ni Tatamusuki” na tamata ni Kalou. Eda na uqeti yadudua se rawa vakacava nida na vakaitavi wasoma ena cakacaka e lesi vakalou ni tatamusuki sa vakayacori tiko edaidai.
3 Dua na ka na noda marau nida raici ira na itabagone lotu Vakarisito nira vakasaqara na iyau vakayalo! Oqo e vakalagilagi kina o Jiova, qai vukei ira na itabagone mera kotora e dua na yavu vinaka ni veiqaravi mai muri. Na vosa “Vakavinavinakataki Nodra Cakacaka Vinaka na iTabagone Nira Vakacaucautaki Jiova,” ena vakabibitaka nodra caka vinaka tiko na itabagone lotu Vakarisito ena vanua sara ga era dui tiko kina.
4 Na cava na yaga ni vakasaqara na ivalavala vinaka? Ena qai vakamacala kina na mata mai na valenitabana me iotioti ni nona vosa “Tomana Tiko ga na Cakacaka Vinaka, Tauca na Veivakalougatataki i Jiova.” Ena vosa ena va na taba ni bula eda na tauca kina na veivakalougatataki vakayalo: (1) o keda yadua, (2) vakavuvale, (3) vakaivavakoso, kei na (4) isoqosoqo e vuravura raraba.
5 O ira na sa yalataki ira oti tu vei Jiova sa na veiganiti mera na papitaiso. Ke o sa tu vakarau mo taura na ikalawa oqori, mo tukuna sara vua na ivakatawa daulewa ni ivavakoso.
6 Ni sa kacivaki ga na tikinisiga e caka kina na soqo ena nomu yasayasa, vakavakarau sara mo na tiko kina. Saga mo yaco totolo yani mo rawa ni vakaitavi ni laga na imatai ni sere kei na masu. Noda tiko kei na noda vakatudaliga ena porokaramu ni soqo siga dua oqo, ena vakaukauataki keda meda vakasaqara tiko ga na sala eda vutuniyau kina mai na rai ni Kalou, o Jiova.