Kato ni Taro

◼ Na cava soti me veivosakitaki ena soqoni ni cakacaka vakavunau?

Na inaki ni soqoni ni cakacaka vakavunau me vakarautaki keda vinaka ina noda lai vunau. E bibi gona me vakavakarau vinaka o koya ena liutaka me qai tu vakarau ni wasea e so na vakasama ena veiuqeti, e matata vinaka, qai yaga. E rawa ni wiliki qai veivosakitaki vakalekaleka na tikinivolatabu ni siga e caka kina na sota kevaka e vakabibitaka na cakacaka vakavunau. Ia na veivosaki e dodonu me vakamuai ga vakatabakidua ina cakacaka vakavunau, mera vukei kina o ira kece na lai vunau mera na rawata vinaka na nodra itavi ena siga oya.​—2 Tim. 4:5.

Rawa ni veivosakitaki na tikina veiganiti mai na Noda Cakacaka Vakaitalatala ni Matanitu mera kila kina na lewe ni cakacaka vakavunau na ivola me soli kei na iwalewale mera na solia kina na ivola. Ena siga ni soli ivoladraudrau, e rawa ni vakatovotovotaki e dua na iwalewale e volai toka ena ulutaga “Ka Mo Kaya me Baleta na iVoladraudrau.” Ena so tale na gauna ni cakacaka, de dua e rawa ni kau cake mai e dua se rua na ikau ni vosa e tiko ena ivola na Reasoning ena ganita na yalava ena tarai tiko. Rawa ni veivosakitaki se vakatovotovotaki e so na iwalewale, me vaka beka na ivakavakayagataki ni iVolatabu ena matanikatuba, na ka mo kaya ke bese ni vakarorogo o itaukeinivale, nomu veisureti ina vuli iVolatabu, se na nodra dau lesuvi o ira na tataleitaki.

Me kua ni sivia na 10 ina 15 na miniti na soqoni ni cakacaka vakavunau, e wili kina nodra wasewasei o ira na sota mera vunau, lesi ni yalava me tarai, kei na masu. Ni sa oti na veivosaki, sa dodonu mera kila kece o ira na tiko kina se o cei era na cakacaka vata kei na vanua mera cakacakataka, oti oya, mera sa gole sara ga yani. E bibi meda dau yaco yani ena kena gauna dodonu baleta ni lekaleka wale ga na gauna ni sota. Ke mani caka na sota ni cakacaka vakavunau ni oti ga e dua na soqoni vakaivavakoso me vaka na vuli Vale ni Vakatawa, me lekaleka sara na sota oqori. De vinaka me kua ni veivosakitaki na tikinivolatabu ni veisiga, baleta ni se qai oti toka ga na soqoni e sereki kina na ivakavuvuli totoka vakaivolatabu.

Mera lesi rawa tu na tacida tagane matua mera na liutaka na soqoni ni cakacaka vakavunau. Ena siga ena sega ni tiko rawa kina e dua na tagane, me ratou lesia na qase e dua na tacida yalewa papitaiso. Ke caka na sota ena loma ni dua na vale se Kingdom Hall, me dabe toka ga o koya ni liutaka na kena veivosakitaki beka na tikinivolatabu ni veisiga se so tale na tikina ena ganita na cakacaka vakavunau, ia me kua ni vakamacala vakabalavu. E dodonu me ubi na uluna.

Gauna yaga dina na soqoni ni cakacaka vakavunau meda vakayaloqaqataki kina da qai vakarautaki vinaka meda vakaitavi ena cakacaka vakavunau. Kevaka e vakavakarau vinaka o koya ena liutaka na sota, era na vakila na kena yaga o ira na tiko kina.