Me Yaga Vei Keda na Sota ena Cakacaka Vakavunau
1. E vukei keda vakacava na sota ena cakacaka vakavunau?
1 Ni laulau na veika e veivosakitaki ena sota ni cakacaka vakavunau, ena veivakauqeti, e vakarautaki keda vinaka tale ga ni bera nida lako yani ena cakacaka vakavunau. Dua tale na kena yaga na sotasota vaka oqo, oya nida lai veitomani kei ira na tacida ena cakacaka vakavunau, e rawa kina nida veitokoni da qai veituberi tale ga. (Vkai. 27:17; Dauv. 4:9, 10) Na cava meda cakava me yaga kina vei keda na sota ena cakacaka vakavunau?
2. Na cava e so na ka e rawa ni veivosakitaka o koya e liutaka na cakacaka?
2 Vua e Liutaka na Cakacaka: Macala ga ni duatani toka na sotasota ni cakacaka vakavunau, baleta ni sega ni dua na ituvatuva e vakarautaki tu me yavutaki kina na ka me veivosakitaki. E gadrevi gona me vakavakarau vinaka o koya ena liutaka na cakacaka. Sega ni tukuni me dikevi na tikinivolatabu ni veisiga ena gauna kece ni sota ena cakacaka vakavunau, dina ga ni o rawa ni okata ena nomu ivakamacala, vakauasivi kevaka e salavata na tikinivolatabu ni siga oya kei na cakacaka vakavunau. Me vakasamataka o koya e liutaka na cakacaka e so na tikina e rawa nira vakayagataka na dautukutuku ena cakacaka vakavunau ena siga oya. Kena ivakaraitaki, o rawa ni veivosakitaka se me vakatasuasuataki sara ga e dua na iucu se iwalewale ni vunau. Se, o rawa ni digia e dua na tikina mai na ivola na Reasoning, na ivola na Vuli Vunau, se dua na itavi e se qai veivosakitaki oti ga ena Soqoni ni Cakacaka. So na gauna o rawa ni veivosakitaka na sala me wali kina e so na iulubale ena rairai sotavi ena yalava e tarai oqori, se na sala me bucini kina na tataleitaki qai tauyavu sara na vuli iVolatabu, vakauasivi ke levu era na veisikovi lesu tiko ena siga oya. Ia, se cava o digitaka mo veivosakitaka, e bibi tale ga me veivakauqeti na ka o kaya qai veivakayaloqaqataki.
3. Me vakacava na balavu ni sota, kei na cava me sa matata vinaka ni tini na sotasota?
3 Me tekivu na sota ena kena gauna, e dina ga ni so era na bera mai. Vakatulewa vakayalomatua ena nodra wasei o ira na cakacaka vata, mo raica tale ga me veirauti na yalava ena tarai. Me kua ni sivia na 10 ina 15 na miniti na balavu ni sota, ia ena vinaka me lekaleka sara kevaka e caka na sota ni oti ga na soqoni ni ivavakoso. Ni bera nira biubiu na dautukutuku, me sa matata vei ira kece na yalava ena tarai, vaka kina o cei era na cakacaka vata. Me qai tini na sota ena masu.
4. Meda tokona vakacava na sota ena cakacaka vakavunau me yaga kina vei keda yadudua?
4 O Rawa ni Veitokoni: Me vaka ga eda dau cakava ena soqoni ni ivavakoso, oya noda yaco yani ena kena gauna, meda cakava tale ga vaka kina nida lai sota ena cakacaka vakavunau, ni oqo e vakaraitaka noda dokai Jiova vaka kina noda veinanumi. Ni caka na veivosaki, da vakaitavi ke gadrevi. Ena vinaka me veilesi o koya e liutaka na cakacaka, e rawa tale ga nida sa veivosakitaka rawa tu mai o koya meda na cakacaka vata. Kevaka eda sa veivosakitaka rawa tu mai, da saga meda ‘dolava vakalevu na lomada’ ena noda dau cakacaka vata kei ira e so tale na dautukutuku, meda kua ni cakacaka tiko ga kei ira na noda itokani voleka. (2 Kor. 6:11-13, VV) Ni sa oti na sota, meda kua tale ni via veisautaka na ituvatuva sa macala oti, da vakatotolo sara yani ina yalava me tarai.
5. Na cava na inaki ni noda dau sota ena cakacaka vakavunau?
5 Na inaki ni noda sota ena cakacaka vakavunau e tautauvata sara ga kei na noda tiko ena soqoni. Era tuvanaki me rawa nida ‘vakasamataka na sala meda veivakauqeti kina ena loloma kei na cakacaka vinaka.’ (Iper. 10:24, 25, VV) Kevaka eda saga me yaga tale ga vei keda na sota vaka oqo, ena vukei keda meda cakava vinaka kina noda cakacaka vakavunau—“na cakacaka vinaka” duadua!