Me Yaga na Soqoni ni Cakacaka Vakavunau

1. Na cava na inaki ni soqoni ni cakacaka vakavunau?

¹ Dua na gauna e vosa o Jisu vei ira na le 70 na nona tisaipeli ni bera nira lai vunau. (Luke 10:1-11) E vakayaloqaqataki ira ni tukuna nira sega ni cakacaka duadua, ena dusimaki ira na “Turaga ni tatamusuki,” o Jiova. E dusimaki ira tale ga ena ka mera cakava, e lesi ira mera cakacaka “yarua.” Nikua, e tautauvata tale ga na inaki ni soqoni ni cakacaka vakavunau ni bera nida lai vunau, oya me veivakayaloqaqataki, me vakarautaki keda qai tuvanaki vakamatau.

2. Me vakacava na balavu ni soqoni ni cakacaka vakavunau?

² Na soqoni qo e dau 10 ina 15 na miniti, okati kina na nodra lesi na mataveitacini, na yalava me tarai, kei na masu. Sa na veisau na ituvatuva qo. Me tekivu na Epereli, me caka ga ena lima ina vitu na miniti na soqoni qo. Ia ke caka ni oti na soqoni ni ivavakoso, me lekaleka sara ni sa veivosakitaki oti na iVolatabu ena soqoni. Ena levu kina na gauna e vakayagataki ena vunau. Kena ikuri, ke ra tekivu vunau na painia se dautukutuku ni bera na sota, era na cegu ga vakalekaleka ena nodra vunau.

3. Me tuvanaki vakacava na soqoni ni cakacaka vakavunau me yaga vakalevu vei ira na dautukutuku?

³ Me yaga vakalevu vei ira na dautukutuku na soqoni ni cakacaka vakavunau, e vinakati me tuvanaki vakamatau. Ena levu na ivavakoso ena vinaka mera sota ga na lewe ni dua na iwasewase lailai, me kua nira lai kumuni tu ena dua ga na vanua e vica na iwasewase lailai. Qo ena vakarawarawataka na nodra gole ina vanua ni sota na dautukutuku, vaka kina ina yalava ni vunau. Mera wasei vakatotolo na dautukutuku. Qo ena vakarawarawataka vei ira na ivakatawa mera kauaitaki ira na lewe ni nodra iwasewase. Me veivosakitaka na ilawalawa qase na ituvaki ena yalava, qai raica na ka e veiganiti. Ni bera ni vakacavari na soqoni ni cakacaka vakavunau ena masu lekaleka, me sa matata vei ira na mataveitacini na vanua mera lako kina kei koya mera cakacaka vata.

4. Na cava me kua ni raici kina vakamamada na soqoni ni cakacaka vakavunau ni vakatauvatani kei na soqoni vakaivavakoso?

⁴ Kua ni Raici Vakamamada: E yaga na soqoni ni cakacaka vakavunau vei ira na tiko kina. Era na rairai sega ni tiko kece na lewe ni ivavakoso. Sega ni kena ibalebale qo me raici vakamamada, se nanumi ni sega soti ni bibi ni vakatauvatani kei na soqoni vakaivavakoso. Me vaka ga na noda soqoni kece, na soqoni ni cakacaka vakavunau e dua na sala e vukei keda kina o Jiova meda veivakauqeti, meda veilomani, meda caka vinaka tale ga. (Iper. 10:24, 25) O koya gona, me vakarau vinaka o koya e liutaka na veivosaki me rokovi kina o Jiova qai yaga vei ira na tiko. Ke rawa, mera saga na dautukutuku era lai vunau mera tiko ena vanua ni sota.

5. (a) Na cava na itavi ni ivakatawa ni cakacaka ena tuvanaki ni soqoni ni cakacaka vakavunau? (b) Me liutaka vakacava na tacida yalewa na soqoni ni cakacaka vakavunau?

⁵ Vakavakarau o Koya e Liutaka: Me vakarautaki vinaka na itavi ena soqoni ni ivavakoso, me soli ni vo tu e levu na gauna. E dina tale ga qori me baleta na soqoni ni cakacaka vakavunau. Ni sota ga na iwasewase lalai, ena liutaka na soqoni ni cakacaka vakavunau na kedra ivakatawa se nodra ivukevuke. Ia ke caka na sota vakaivavakoso, ena lesia na ivakatawa ni cakacaka e dua me liutaka. Eso na ivakatawa ni cakacaka era solia vei ira kece na ivakatawa ni iwasewase lalai e dua na ituvatuva, e vakabira tale ga e dua ena papa ni itukutuku. Me lewa vinaka na ivakatawa ni cakacaka o koya e lesia me liutaka na soqoni ni cakacaka vakavunau. Na yaga ni soqoni qo e vakatau ena maqosa ni veivakavulici kei na tuvatuva vinaka i koya e liutaka. Ena so na gauna ena sega ni tiko e dua na qase, se dauveiqaravi, se dua na tagane papitaiso, me kerea na ivakatawa ni cakacaka e dua na tacida yalewa matua me liutaka na soqoni ni cakacaka vakavunau.—Raica na ulutaga “Ni Liutaka na Tacida Yalewa.”

Me kua ni raici vakamamada na soqoni ni cakacaka vakavunau, se nanumi ni sega soti ni bibi ni vakatauvatani kei na soqoni vakaivavakoso

6. Na cava e bibi kina me vakavakarau vinaka o koya e liutaka na soqoni ni cakacaka vakavunau?

⁶ Nida lesi ena dua na itavi ena Koronivuli ni Vuli Vunau se Soqoni ni Cakacaka, eda raica vakabibi qai vakavakarau vinaka. E sega ni levu vei keda ena vakasamataka na ka meda kaya nida sa gole tiko ina soqoni. Me raica tale ga vakabibi o koya e lesi me liutaka na soqoni ni cakacaka vakavunau na nona itavi. Ni sa vakalekalekataki na soqoni ni cakacaka vakavunau, e bibi sara na vakavakarau me rawa ni yaga qai tini ena kena gauna. Na vakavakarau vinaka e okati tale ga kina na kena kilai rawa na yalava me cakacakataki.

7. Na cava eso na ka e rawa ni veivosakitaka o koya e liutaka na soqoni ni cakacaka vakavunau?

⁷ Tikina me Veivosakitaki: Ni duidui na ituvaki ena veivanua, e sega kina ni vakarautaka na dauveiqaravi yalodina na suinivunau me baleta na soqoni ni cakacaka vakavunau. Na kato “Na ka e Rawa ni Veivosakitaki ena Soqoni ni Cakacaka Vakavunau” e vakatututaki kina eso na ka e rawa ni veivosakitaki. Era na vakaitavi na mataveitacini ena veivosaki. Ena so na gauna, ena okati kina e dua na vakatasuasua vakarautaki vinaka se dua na vidio veiganiti mai na jw.org. Ni vakavakarau o koya e liutaka na soqoni ni cakacaka vakavunau, me vakasamataka na sala me veivakauqeti kina qai vakarautaki ira na gole yani ena vunau ena siga oya.

Ni vakavakarau o koya e liutaka na soqoni ni cakacaka vakavunau, me vakasamataka na sala me veivakauqeti kina qai vakarautaki ira na gole yani ena vunau ena siga oya

8. Na cava e vinaka me veivosakitaki ena soqoni ni cakacaka vakavunau ena Vakarauwai kei na Sigatabu?

⁸ Kena ivakaraitaki, e levu na dautukutuku era na solia Na Vale ni Vakatawa kei na Yadra! ena siga Vakarauwai. Levu era vunau ena Vakarauwai era sega ni vunau ena loma ni macawa, era na rairai guilecava na ka era vakatovotovotaka ena nodra Sokalou Vakavuvale. E vinaka me railesuva o koya e liutaka na soqoni ni cakacaka vakavunau e dua na vakatutu e tiko ena otioti ni tabana ni Cakacaka Vakaitalatala. Rawa tale ga ni veivosakitaki na sala me vakayagataki kina e dua na ka e yaco ena noda vanua, dua na soqo, se na olodei nida vakamacalataka na kena soli na mekesini, se na kena biu e dua na yavu ni noda veisikovi lesu ke tauri na mekesini. Ke so era sa solia tiko na mekesini ena vula oya, e rawa nira tarogi mera tukuna eso na vakatutu era vakayagataka, se talanoataka na ka vinaka era sotava. Rawa ni caka tale qori ena Sigatabu me baleta na ivola ena soli ena vula oya. Rawa ni soli ena dua ga na gauna na ivola ni vuli me vaka na brochure iTukutuku Vinaka, na Vakarorogo Vua na Kalou kei na ivola Kaya na iVolatabu, rawa gona ni veivosakitaki vakalekaleka ena soqoni ni cakacaka vakavunau na kena soli e dua na ivola qo.

9. Na cava ena veivosakitaki ena muanimacawa e tuvanaki kina na cakacaka lavotaki?

⁹ Ke tuvanaki na cakacaka lavotaki ena muanimacawa, o koya e liutaka na soqoni ni cakacaka vakavunau e rawa ni veivosakitaka na kena soli vata na mekesini ni vula oya kei na ivola ni veisureti se tikidua, se rawa ni veivosakitaka na ka me caka ni laurai na tataleitaki. E rawa tale ga ni talanoataki eso na ka e sotavi me vakaraitaka na yaga ni cakacaka lavotaki va qo.

10, 11. Na cava e bibi kina meda vakavakarau na dautukutuku me yaga kina na soqoni ni cakacaka vakavunau?

¹⁰ Tikina Mera Vakarautaka na Dautukutuku: E tiko tale ga na nodra itavi na dautukutuku era tiko ena soqoni ni cakacaka vakavunau me rawa ni yaga kina. Era na rairai vakavakarau ena gauna ni sokalou vakavuvale, ena yaga na ka era vakarautaka qori nira veivosakitaka kei na so tale na dautukutuku. Okati ena vakavakarau vinaka na kena tauri rawa mai na mekesini kei na ivola ni bera na soqoni ni cakacaka vakavunau me rawa nida lako totolo ina yalava.

¹¹ E bibi tale ga meda yaco totolo yani ni bera ni tekivu na soqoni ni cakacaka vakavunau. Macala nida dau saga meda totolo yani ena soqoni ni ivavakoso. Ia e dau veivakasosani sara nida bera yani ena soqoni ni cakacaka vakavunau. Ena sala cava? O koya e liutaka na soqoni ni cakacaka vakavunau ena vakasamataka e vica na ka ni bera ni wasei ira na mataveitacini. Ke le vica era tiko, e rawa ni lesi ira mera vunau ena yalava e se bera ni tarai oti. Ke so era taubale yani ena vanua ni sota, qai yawa na vanua me cakacakataki, e rawa ni lesi ira qo mera cakacakavata kei ira na vakamotoka. Ke cakacakataki na vanua e levu kina na basulawa, rawa ni lesi ira na tagane mera cakacaka voleka kei ira na tacida yalewa se mera veisa vata. Rawa nira lesi na dautukutuku malumalumu mera lako ena vanua e sega ni levu kina na cabe se na vale e sega kina na ikabakaba. E rawa nira lesi na dautukutuku vou mera cakacaka vata kei ira sa dede. Ke ra bera mai eso, dau caka na veisau vei ira na veisa oti mera okati kina o ira na bera mai. Ena so na gauna e tiko na vuna vinaka eda bera yani kina. Ia ke noda ivakarau na bera, ena vinaka meda dikevi keda se da raica vakabibi na soqoni ni cakacaka vakavunau, se da sega ni vakarautaki keda vinaka ni bera na vunau.

12. Ke o dau cakava rawa tu eso na nomu ituvatuva, na cava o rawa ni vakasamataka?

¹² Ni bera na sota e rawa nira veinaki eso mera cakacaka vata, se na lesi yani e dua mera cakacaka vata. Ke o dau veinaki, ena vinaka mo “lomasavu” ni o cakacaka vata kei na so tale na dautukutuku, mo kua ni cakacaka vata tiko ga kei koya drau veikilai vinaka. (2 Kor. 6:11-13) Ena so na gauna o rawa ni tuvanaka mo cakacaka kei na dua na dautukutuku vou, mo vukei koya me vakavinakataka nona ivakarau ni veivakavulici. (1 Kor. 10:24; 1 Tim. 4:13, 15) Rogoca vinaka na idusidusi e vakarautaki, okati kina na vanua me tekivu kina na vunau. Ni oti na soqoni ni cakacaka vakavunau, kua ni veisautaka na ituvatuva, mo biubiu totolo sara.

13. Ke da kauaitaka meda cakava na noda itavi, ena yaga vakacava na soqoni ni cakacaka vakavunau?

¹³ “Dua na ka nodra marau” na le 70 nira lesu mai na vunau. (Luke 10:17) Macala ni vukei ira vakalevu na nona vosa vei ira o Jisu ni bera nira lai vunau. E yaga tale ga va qori na soqoni ni cakacaka vakavunau ena gauna qo. Ke da kauaitaka meda cakava na noda itavi, ena veivakayaloqaqataki na soqoni va qo, ena vakarautaki keda, eda na tuvanaki tale ga vakamatau meda vakayacora noda ilesilesi meda “ivakadinadina ina veimatanitu kece.”—Maciu 24:14.

Ni Liutaka na Tacida Yalewa

Me ubi na uluna, dau vakalevu ga me dabe ni liutaka na soqoni ni cakacaka vakavunau. Na ka ena veivosakitaka ena tautauvata ga kei na ka ena veivosakitaka na tacida tagane. Ena sega ni liutaka na veivosaki me vaka e veidusimaki tiko, ena tekivutaka ga na veivosaki. Ke kerea e dua tale na tacida yalewa papitaiso me masu, ena ubi tale ga na uluna. Ke bera yani e dua na tacida tagane, ena kerei koya me tinia na veivosaki. Me saga me kila na ivakatawa ni cakacaka eso na ituvaki ena rawa ni basika, me vakarautaka na veidusimaki veiganiti me kua kina na veilecayaki. Kena ivakaraitaki, ena rairai tiko e dua na tacida tagane e gone sara ni sa kerei oti tu e dua na tacida yalewa me liutaka na soqoni ni cakacaka vakavunau, ia ratou nanuma na qase ni se sega ni ganiti koya na tacida gone qori me liutaka na soqoni ni cakacaka vakavunau. Me tukuna na ivakatawa ni cakacaka ni na liutaka na soqoni qori na tacida yalewa, ia e rawa ni masu na tacida tagane ke ratou nanuma na qase ni ganiti koya. Se na tiko e dua na tacida tagane ratou kila ga na qase na vakatatabu e caka vua, e sega ni vakatarai me dau liutaka na soqoni ni cakacaka vakavunau se me masu ena gauna ni soqoni vakaivavakoso. Ratou na sega ni tukuna na qase na vuna, ratou na tukuna ga vua na tacida yalewa me liutaka na soqoni ni cakacaka vakavunau qai masu, ke tiko mada ga na tacida oya. Ratou na tukuna tale ga vua na tacida tagane oya na siga era na kerei kina na yalewa mera liutaka na soqoni ni cakacaka vakavunau.

Na ka e Rawa ni Veivosakitaki ena Soqoni ni Cakacaka Vakavunau:

Na vakatutu ena Noda Cakacaka Vakaitalatala.
Dua na vidio mai na jw.org me baleta na vunau.
Dua na tikina me baleta na laulau ni noda. vakamacala, me vaka na ikaunivosa, yavu ni veisikovi lesu, kena tukuni na cau ni tauri na ivola.
Dua na tikinivolatabu veivakauqeti se ivakaraitaki vakaivolatabu me baleta na cakacaka vakaitalatala.
Dua na irogo ena noda vanua se tabaki ena noda ivola me baleta na cakacaka vakavunau.
iVakamacala ena dua na ulutaga ena Noda Cakacaka Vakaitalatala.
iVakamacala ena dua na itavi ni Soqoni ni Cakacaka sa caka oti.
iVakamacala me baleta na cakacaka vakaitalatala ena Vale ni Vakatawa.
iVakamacala me baleta na cakacaka vakaitalatala ena ivola me vaka na Koronivuli ni Vuli Vunau kei na “Mai Muri Au.”
Dua na ulutaga mai na jw.org e rawa ni vakayagataki ena vunau.
Dua na ulutaga ena Vakadewa ni Vuravura Vou e vakavoutaki e rawa ni vakayagataki ena cakacaka vakaitalatala.
Na kena tekivutaki na veivosaki kei na dua e sega ni vakabauta ni bula tiko na Kalou, koya e vakabauta na bula vakaidewadewa, lotu Idu, se lotu Buda.
Ka mo tukuna ke sega ni via vakarorogo e dua.
Sala mo vukea kina na kemu isa me laulau nona vosa.
Ka mo cakava ni o sotava e dua e vosataka e dua tale na vosa.
Sala mo vakaitavi kina ena so tale na tabana ni cakacaka vakaitalatala me vaka na vaqaqara, vunau ena talevoni, vunau e matanalevu, veisikovi lesu, se caka vuli iVolatabu.
Na ivakasala baleta na qaqarauni, yalorawarawa, itovo vinaka, rai donu, kei na so tale.