Tukuna Vakadodonu na Vosa ni Kalou
1 Ni vunau tiko vua e dua na vakailesilesi, “sa qai dalaga ko Filipi, ka sa vakatekivu e na tiki ni Volatabu ko ya, a sa vunautaki Jisu vua.” (Caka. 8:35) E “tukuna vakadodonu sara na ka dina,” o Filipi. (2 Tim. 2:15, VV) Ia, edaidai, era raica rawa na ivakatawa dauveilakoyaki nira sa sega so ni dau vakayagataka na dautukutuku na iVolatabu ena gauna era vunau kina. O dau vakayagataka na iVolatabu ena cakacaka vakaitalatala?
2 Na Vosa ni Kalou e ivurevure ni noda vakabauta kei na noda ivakavuvuli. (2 Tim. 3:16, 17) Oqo na ka e dreti ira na tamata vei Jiova qai vakavulici ira mera rawata na bula. Oqori na vuna meda vakayagataka kina na iVolatabu ena cakacaka vakaitalatala mai na noda vakamacalataka wale tu ga na ulutaga eda taleitaka. (Iper. 4:12) Ni levu era sega ni kila vinaka na iVolatabu, e gadrevi meda na wilika sara ga vei ira qai dusia mai kina na ivakasala yaga kei na inuinui e dulaki tu vua na kawatamata.
3 Wilika Sara ga na iVolatabu: O na rairai sega ni via kauta nomu kato ni vunau. O na tawana toka ga na ivola o via solia ena dua na waqaveva qai biu toka na iVolatabu ena nomu taga se o taura tiko ga, me kua kina ni vaka o via vunau vei koya o vakamacala tiko vua. Drau raica vata na iVolatabu. Rawa tale ga ni o kerei koya me wilika vakadomoilevu. Ena yaga sara ke raica ni o wilika na iVolatabu, mai na nona rogoca wale tu ga na ka o tukuna tiko. Me kila vinaka na ka e wiliki, mo vakamatatataka na vosa e bibi.
4 Dua na Tikinivolatabu: Ni o drau sa veikilai oti o na rairai kaya sara: “Era vaqara na tamata e vuqa na sala mera dusimaki kina. Na cava oni nanuma e ivurevure ni vakasala yaga? [Waraka me sauma.] Na cava mada oni nanuma ena itukutuku oqo? [Wilika na Vkai. 2:6, 7, qai waraka me sauma.] Na vuku vakatamata e vakavuleqa vakalevu qai veivakayalolailaitaki. Ia na vuku vakalou e nuitaki qai yaga.” Solia na ivola, qai dusia vua e dua na ivakaraitaki ni yaga na vuku vakalou.
5 O Jisu a vakayagataka na iVolatabu me vukei ira kina na tamata lomadina. (Luke 24:32) O Paula a vakadinadinataka mai na iVolatabu na veika e vakavulica. (Caka. 17:2, 3) Eda na nuidei da qai marautaka na cakacaka vakaitalatala nida sa matau ni tukuna vakadodonu na Vosa ni Kalou.