Cakayaco ni Vidio—Me iVakadinadina
1 “Tekivu sarava na luve i keirau na vidio ni se bera mada ga ni vakavuvuli lako. E sarava vakavica vata. E marautaki dina ni tu na ivukevuke yaga vaka oqo vei ira na gone mera bucina kina na lomani Jiova!” Na vidio cava e tukuna tiko na itubutubu lotu Vakarisito oqo? Na kena e vakatokai Noah—He Walked With God. E sarava na luvena e dua na tina e sega ni lotu Vakarisito na vidio oqo ena dua tale na vale, mani vakauta kina na marama oqo na cau e rauta ni $180 ina valenitabana qai taroga ke tu tale e so na vidio ni gone. Na vidio kece e vakarautaka na isoqosoqo i Jiova sa vakayacoka tiko vei ira na qase kei na gone.
2 Ena Vuvale: Ni ratou sarava oti na Jehovah’s Witnesses Stand Firm Against Nazi Assault e dua na vuvale iVakadinadina, kaya sara o tinadratou: “Au drukataka na nona solia rawa o Jiova na kaukaua vei ira na tamata vakataki au ga mera vosota na veivakararawataki mosimosi! Niu vakasamataka, au raica ni lailai wale na noqu leqa ni vakatauvatani kei na ka era sotava. Ni keitou sarava vakavuvale na vidio oqo, e vukei rau na gone me rau raica na bibi ni vakararavi vei Jiova. Ni keitou veivosakitaka ni sa saravi oti, keirau sa vukei rau tiko kina na gone me rau tu vakarau ni sotavi na veitusaqati se na ituvaki dredre cava ga.”
3 E Koronivuli: A vakaraitaka vakatikina e dua na itabagone iVakadinadina ina nona kalasi na vidio Stand Firm, me tiki ni dua na lesoni a vakarautaka. E sega ni dau taleitaki ira na iVakadinadina i Jiova na nona qasenivuli. Ia ni sa sarava oti na vidio, a kaya: “E veisautaka sara ga na noqu rai me baleti ira na iVakadinadina i Jiova. Au yalataka ni gauna era na veisiko tale mai kina i vale, au na vakarorogo vei ira, meu na tekivu vulica tale ga na iVolatabu!” Na cava e veisautaka nona rai me baleti keda? E kaya o koya ni noda “veilomani dina kei na yalodina.”
4 Ena Cakacaka Vakaitalatala: A sotava na tacida yalewa e dua na marama e sega ni vinakata me taura na ivola vakaivolatabu dina ga ni tu na nona vakatataro me baleti keda kei na noda vakabauta. A lesuvi koya na tacida yalewa qai kauta na vidio Jehovah’s Witnesses—The Organization Behind the Name, qai vakaraitaka vei rau vakaveiwatini. Rau drukataka sara ga, rau mani vakadonuya me rau vulica tale ga na iVolatabu. Ena vuku ni ivakadinadina vinaka e soli vei rau, e veisautaka sara ga na nodrau bula me salavata kei na loma ni Kalou.
5 O sa vakayagataka vinaka tiko na noda vidio?