Vunau ka Vakadinadina
1 Ni “turaga ka vu-ni-vunau,” o Jisu, a vakarautaki ira nona tisaipeli mera colata na cakacaka vakavunau vakaitamera a tu e matadra. (Aisea 55:4; Luke 10:1-12; Caka. 1:8) E vakamacalataka vaka oqo o Pita na ilesilesi oya i Jisu vei ira: “Sa vakarota vei keitou me keitou vunau vei ira na tamata, ka vakadinadina ni sai koya ga ka lesia eliu na Kalou me lewai ira na bula kei ira na mate.” (Caka. 10:42) Na cava me cakava o koya e vakadinadina?
2 Levu na ka eda na vulica nida dikeva na ka e cakava o Paula. Ni sota kei ira na qase ni ivavakoso mai Efeso, e kaya vei ira: “Ka’u a sega ni rere me’u kua kina ni tukuna e dua na ka sa yaga vei kemudou, ka’u vakavulici kemudou, ni dou sa soqoni vata, e na veivale talega, ni’u a vakarota tiko kivei ira na Jiu, vei ira talega na veimatanitu tani, na veivutuni vua na Kalou, kei na vakabauta na noda Turaga ko Jisu Karisito.” Dina ni sotava na veika dredre o Paula, e tovolea ga me wasea yani na itukutuku vinaka ena kena levu e rawata. A sega ni cegu na lomana me tukuna vei ira na rogoci koya na yavu wale ga ni ka dina, ia e saga me wasea na “loma ni Kalou taucoko.” A gu na yalona me cakava na ka kece e rawa ni vakayacora, veitalia mada ke vakayalia kina e so na ka. E kaya tale: “Ka’u sa sega sara ni nanuma na noqu bula me ka talei vei au ka me’u vakaotia ga na noqu cakacaka kei nai tavi ka solia mai vei au na Turaga ko Jisu, me’u vakatakila nai tukutuku-vinaka ni loloma ni Kalou.”—Caka. 20:20, 21, 24, 27.
3 Eda na vakamurimuria vakacava na ivakaraitaki i Paula? (1 Kor. 11:1) Ena noda vaqarai ira na itaukeinivale yalomalumalumu e dina nida sotava voli na veika dredre, noda saga meda vunautaka na itukutuku vinaka vei ira na tamata kece ga e duatani nodra vosa se ra cavutu mai na dui vanua, kei na noda lesuvi ira na tataleitaki meda vukei ira mera toso. (Maciu 10:12, 13) Na ka oqo ena vinakati kina na gauna, sasaga, kei na loloma.
4 O Rawa ni Painia Veivuke? Na vula veiganiti mo vakadinadina vinaka kina ena nomu painia veivuke na Maji kei na Epereli. Veivakauqeti dina na iwiliwili levu era painia veivuke rawa ena yabaki sa oti!
5 E dua na tacida yalewa tautauvimate sa yabaki 80, e uqeti koya sara ga na vosa ni veivakayaloqaqataki e tauca na isoqosoqo i Jiova. E vola: “E vakacaudreva sara ga na gagadre sa tu makawa e lomaqu, oya me bau vakadua tale mada na noqu painia veivuke.” Lomana sara me cakava oqo ena vula o Maji. “Na imatai ni ka au vakayacora, au dabe sara ga meu dikeva seu na rawata se sega. Au veivosakitaka na tikina oqo kei na luvequ yalewa ni o koya ga ena rawa ni vukei au kina. Au kurabui ni sa lai kerea me dua tale ga nona fomu ni painia.” E 52 taucoko na nona aua ni cakacaka ena vula oya na buda oqo. “Vakavica vata noqu masuti Jiova me vakaukauataki au ni sa vaka me oti mai noqu igu. Ia ni sa cava na vula, sa dua na ka noqu marau kei na vakacegu, au vakavinavinaka vakavica vata vei Jiova ni vukei au. Au na tovolea meu painia tale.” Na itukutuku marautaki oqo ena rawa ni uqeti ira na tauvimate bibi e gu na yalodra mera painia veivuke tale ga.
6 A vakacegui vakasauri mai na nona cakacaka saumi e dua na tacida, mani painia veivuke sara. Ni toso na vula, sa qai taleitaka cake ga na cakacaka vakavunau, ia ni cava na vula, sa dua na nona vuli iVolatabu vou. E kaya ni vakasamataka lesu na gauna oya: “Sa tu tu e dua na vula!” E marautaka dina na veidusimaki i Jiova kei na nona veivuke! Io, e sovaraka o Jiova na veivakalougatataki levu vua na tacida oya ena vuku ni nona sasaga vagumatua me baleta na cakacaka vakavunau. Ena vakayacora tale ga oqori vei iko.—Mala. 3:10.
7 E levu e sega ni dau rawarawa vei ira na cakacaka vakapainia. Ia e dua na iwiliwili vinaka ni tacida era sa tovolea na cakacaka oqo e dina nira cakacaka saumi se tu nodra icolacola vakavuvale, se ra sotava e so na ituvaki dredre. Noda vakadinadina vinaka ena vinakati kina noda gauna kei na igu, ia e sega ni tukuni rawa na levu ni kena veivakalougatataki.—Vkai. 10:22.
8 Erau vula veiganiti na Maji kei na Epereli meda painia veivuke kina. E lima tiko na muanimacawa ena Maji. De rawa nira painia na cakacaka saumi nira vakayagataka na muanimacawa oqori kei na veiyakavi bogi mera cakacaka vakavunau kina. Qai kena ikuri na siga ni olodei ena vula o Epereli. E so tale e rawa nira vakayagataka na vakacagicagi mai koronivuli se so na siga ni gade mai na cakacaka me rawata na 50 na aua e gadrevi. Vakacava mo vakayagataka e dua vei ira na ituvatuva ni cakacaka vakapainia veivuke e tiko ena ulutaga oqo mo tuva vinaka kina na 50 na aua mo na rawata ena vula o Maji kei na Epereli? Veivosakitaka kei na so tale na nomu ituvatuva; de dua era na via tomani iko tale ga kina ena cakacaka vakaitalatala. Ke o sega ni painia veivuke rawa, navuca ga e so na nomu isausau me baleta na rua na vula oqo, qai tokoni ira na rawa ni painia. Lalawataka rawa edaidai mo vakalevutaka nomu cakacaka ena vula o Maji kei na Epereli.
9 Doka na iVakananumi: Donuya na iVakananumi e veiyabaki, era dau ‘volia na gauna’ e vica vata na udolu mera painia veivuke kina me ivakaraitaki ni nodra vakavinavinakataka na ivoli. (Efeso 5:15, 16) Ena yabaki sa oti, ena vula o Maji, era painia veivuke kina e Viti taucoko e 308, ia e 146 ena vula o Epereli. Veidutaitaka mada oya kei na 46 era painia veivuke ena Janueri kei na Feperueri ni yabaki vata ga oya. Se baci gauna vinaka na iVakananumi ni yabaki oqo meda vakaraitaka kina nida doka na isoro i Karisito ena noda vakalevutaka noda cakacaka vakaitalatala.
10 Ni sa roro mai na 16 ni Epereli, vakasamataka mada na ibalebale ni iVakananumi. Vakananuma na veika e yaco ena bula i Karisito ni se bera ni vakamatei, kei na vakanananu ena osota tu beka nona vakasama kei na lomana. Vakananuma tale ga na ka rekitaki a biu e mata i Jisu e vosota rawa kina na veika rarawa. Vakasamataka nona itutu vakaulu ni ivavakoso, ena nona dusimaka tiko na cakacaka vakavunau kei na nodra vukei na tamata mera tisaipeli. (1 Kor. 11:3; Iper. 12:2; Vkta. 14:14-16) Oti qai vakaraitaka nomu vakavinavinakataka na ka kece sa cakava na Karisito ena nomu vakalevutaka nomu cakacaka vakavunau me salavata kei na kemu ituvaki.
11 Uqeta e So Tale Mera Vakadinadina Vakavinaka: Ke ra vakaitavi tale ga na qase kei na dauveiqaravi vakaitalatala ena cakacaka vakapainia, ena veiuqeti cake na nodra veisureti ena cakacaka oqo. Levu sara na gauna mera vukea kina na tacidra mera cuqena na cakacaka lavotaki oqo nira veitomani kei ira ena cakacaka vakavunau se ra sikovi ira ena nodra lai veivakatawani. De vinaka meda masulaka mada ga na cakacaka ena rua na vula lavotaki oqori, me rawa ni tosoi keda vata meda vakadinadina vinaka sara.
12 Dina nira na tokona na qase kei na dauveiqaravi vakaitalatala na ituvatuva vakaivavakoso me baleta na cakacaka ena vula o Maji kei na Epereli, ia na ivakatawa ni cakacaka ena nona itavi sara ga me cicivaka vakamatau na cakacaka vakaitalatala. Me navuca na vanua ni sota, na kena siga, kei na gauna ena ganita e dua na iwase levu ni dautukutuku, me qai raica me kacivaki wasoma oqori. De rawa ni tuvai me vica na dui gauna ni cakacaka vakavunau ena dua tiko ga na siga, me rawa nira vakaitavi kina na lewe kece ni ivavakoso ena dui basoga ni cakacaka vakaitalatala. De rawa ni wili e ke na yalava ni bisinisi, vunau e gaunisala, vunau e veivale, veisikovi lesu, kei na vunau ena talevoni. Kena ikuri, me raica o koya ni na veiganiti na levu ni ivoladraudrau, ivola, kei na yalava ni cakacaka ena rua na vula oqori.
13 Ena soli tiko ena vula o Maji na ivola Na Ka Mo Kila, qai kena inaki meda tekivutaka kina na vuli iVolatabu. So na vakatutu totoka me baleta na soli ni Kila e tiko ena itoma ni vula o Janueri, 2002. Eda na solia ena vula o Epereli Na Vale ni Vakatawa kei na Yadra! Me vakayagataki tale ga na vakatutu ena “Ka Mo Kaya me Baleta na iVoladraudrau.” Me biu vakatikitiki sara ga na gauna meda vakavakarau kina, me rawa nida lai vakadinadina sara vakavinaka.
14 Eda kalougata dina meda mai cakacaka ena ruku i koya na Ulu ni ivavakoso, o Karisito Jisu, me noda kina na itavi dokai meda wasea yani na itukutuku vinaka! Ni sa roro mai na vula o Maji kei na Epereli, meda solia tale mada kina noda vinaka taucoko ena noda talairawarawa ina ivakaro i Karisito meda vunau da qai vakadinadina sara vakavinaka.
[Kato ena tabana e 4]
So na iTuvatuva Mo Rawa ni Painia Veivuke Kina ena Maji kei na Epereli 2003
Siga Aua
Moniti 1 2 — — 2 —
Tusiti 1 — 3 — — —
Vukelulu 12 — 5 — —
Lotulevu 1 — 3 — — —
Vakaraubuka 1 2 — — — —
Vakarauwai 5 4 3 5 6 7
Sigatabu 2 2 3 2 2 3
Maji 56 56 54 55 50 50
Epereli 50 50 51 53 — —
Rawa beka ni o vakayagataka e dua na ituvatuva oqo?