Goletani Mai na “Veika Tawayaga”

¹ Sa vakayagataki vakalevu nikua na sala ni vakauitukutuku ena kompiuta, na yacana na E-mail. E dina ni sega ni cala meda talanoataka kina vei ira na wekada kei na noda itokani na veika eda sotava se na noda rai, ia e tiko na “veika tawayaga” e rawa ni basika ke da sega ni lewa vinaka na noda vakayagataka na E-mail. Na cava beka?​—Vkai. 12:11, NW.

² So na Ka me Qarauni: Era kaya e so ni vakavolekati ira ina isoqosoqo i Jiova na itukutuku era dau wilika ena nodra E-mail era nanuma ni itukutuku butakatakata. Ena wili beka kina na ka era vakasavuirogorogotaka e so, na irogo mai Peceli, itukutuku ni leqa se veivakacacani, kei na so na itukutuku e vakarogotaki ena Vuli ni Qase kei na Dauveiqaravi Vakaitalatala e baleti ira ga oqo. E so era dau via vakauta totolo na itukutuku vaka oya vei ira nodra itokani nira dau via liu duadua ena kena vakarogotaki.

³ So na gauna, ena sega ni donu sara na itukutuku e vakadewataki se na vakatubutaka beka o koya e vakauta. E dau lai cala na rai i koya e ciqociqo ke bulia nona ivakamacala o koya e vakauitukutuku me vakatubuqoroqoro na kena irogorogo. Vakalevu ga mera sega ni kila na kena dina kece o ira na dau via vakacila totolo na ka. (Vkai. 29:20) Ena so na gauna, kevaka mada ga e sega ni dina sara e dua na itukutuku, ena se kaburaki ga me ka tu ni veitalanoa. Ia na itukutuku cala vaka oqori e okati me “veitalanoa tawa vakalotu [se, “italanoa lasutaki,” NW],” e sega sara ga ni dua na kena yaga ena noda sokalou dina.​—1 Tim. 4:6, 7, VV.

⁴ Ke o dau vakauta na itukutuku e sega ni donu, sa rawa ni bale tale ga vei iko na rarawa kei na lomataqaya e vu mai na itukutuku oqori. Ni sa rogoca o Tevita na itukutuku vakatubutaki ni ratou sa vakamatei kece na luvena, sa “dresulaka na nonai sulu” ena rarawa levu. Ia e dua ga vei iratou a vakamatei. Sa bau rarawataki oya, ia e sa qai kuria ga na rarawa i Tevita na kena tukuni vua na ka a sega ni dina. (2 Sam. 13:30-33) Meda kua mada ga ni tukuna na ka ena vakacalai ira na tacida se vakayalolailaitaki ira.

⁵ iTuvatuva ni Kalou: Nanuma tiko ni tu na ituvatuva i koya na Tamada vakalomalagi me vakadewataka mai kina na nona itukutuku. E vakayagataki koya na “dauveiqaravi yalo dina ka vuku.” Na itavi ni “dauveiqaravi” oya me dikeva na itukutuku e gadrevi me vakasavui vei ira na lewenivale era vakabauta, kei na “gauna dodonu” me vakasavui kina. Na kakana vakayalo oqo e takivaka duadua ga mai na isoqosoqo ni Kalou. Sa dodonu ga kina meda rai e veigauna ina ituvatuva oqo ni Kalou e vakasavui mai kina na itukutuku nuitaki, me kua ga vei ira era dau veisoli itukutuku ena Internet.​—Maciu 24:45, VV.

⁶ Internet Web Site: Sa tiko ena Internet na vanua se na Web site meda gole kina ke da via dikeva na ivola ni isoqosoqo. Na Web site oqori na www.watchtower.org. Na itukutuku e vakarautaki kina sa veirauti vinaka sara ga. E sega ni gadrevi tale me dua na tamata, matakomiti, se ivavakoso me vakarautaka ena Internet na itukutuku me baleti ira na iVakadinadina i Jiova. Ia e so era tabaka sara kina na lewe taucoko ni so na noda ivola, na kena tikinivolatabu kece kei na ikuri ni ivakamacala e dau vakarautaki, era bau tabaka tale ga na ivunau e dau rogoci ena soqo ni tikina ra qai lavaka na kena isolisoli. Se mani ka ni vaqara tubu se sega na ka era cakava oqori, e tabu ga ena lawa ni tabaivola na kena tabaki tale kei na kena veisoliyaki na ivola e taukena na iVakadinadina i Jiova. De ra nanuma e so ni oqo e ka ni nodra veivuke ga vei ira na mataveitacini, ia e tabu, e dodonu me mudu.

⁷ Ke da lewa vinaka da lewa tale ga vakayalomatua noda vakayagataka na sala ni vakauitukutuku ena Internet, ena vakasinaiti tiko ga noda vakasama ena veika “sa talei ka vinaka.”​—Vkai. 24:4.