Yaga Noda Tiko ena Soqo ni Tikina na “Dauvunau Gugumatua ni Matanitu ni Kalou”

¹ Veivakabulabulataki Dina: Veivakauqeti dina na veika eda rogoca ena soqo ni tikina sa oti! Eda soqo yani ena duabulu na inaki, meda vukei meda qarava cake vakavinaka na itavi ni kena vunautaki vagumatua na Matanitu ni Kalou. O se nanuma tiko ga nona sereka o koya e vosa duadua e liu na ibalebale ni vosa ‘vunautaka’? O se nanuma tiko na vakekeli eda a uqeti meda vakayacora ena ivunau “Yaloqaqa Nida Kila ni Tiko kei Keda o Jiova”? Me yacova mai oqo, na kedra itukutuku o cei soti o sa wilika?

² Na vosa veitaravi “Ena Vakatovolei na Noda Vakabauta” e vakavotui kina e tolu na vuna e vakatara tiko kina o Jiova na veivakacacani. Na cava beka na tolu na vuna oya? Na cava na yavu vakaivolatabu ni noda tawaveitovaki o keda na lotu Vakarisito? Na cava eda uqeti meda cakava meda vakarautaki keda kina de da mani tarogi ena vuku ni noda tawaveitovaki? Na noda vosota ena yalodina na veika dredre eda sotava e vakacaucautaki kina vakacava o Jiova?

³ Na cava sara mada a vakaukauataki iko ena drama, “Tudei ena Gauna ni Leqa”? Na cava meda cakava meda vakataki Jeremaia kina?

⁴ Na ivunau soqovi levu, “Sa Veisau Tiko o Vuravura” e sereki kina na veisau lelevu cava sa tu oqo e matada era na qai vakatinitini ena siga rerevaki i Jiova? Ni o rogoca na iotioti ni ivunau, “Cakava Tiko ga na Ka Vinaka ni O Dauvunau Gugumatua ni Matanitu ni Kalou,” o vakasotara vakacava na ka o rogoca kei na nomu cakacaka vakavunau?

⁵ Tikina Bibi Mera Vakayagataki: Me vaka eda rogoca ena ivunau “Meda Dau Vakavinavinaka,” eda na vakaraitaka vakacava vei Jiova na noda vakavinavinaka mai vu ni lomada? Na yalogu i cei eda a uqeti meda ucuya me vaka eda rogoca ena ulunivosa “Ra Maqusa na Dauvunau Gugumatua ni Matanitu ni Kalou”? Na taro cava soti eda kerei meda dui tarogi keda kina?

⁶ Na cava na tolu na tikina bibi eda uqeti meda yacova me qai vakadonui keda kina o Jiova, me vaka a kau cake mai ena vosa veitaravi “Vakauqeti Keda na Parofisai i Maika Meda Lako Tiko ga ena Yaca i Jiova”? Sa rui dredre beka me sauvi na tolu na tikina oqori? (Maika 6:8) Me vaka eda rogoca ena vosa “Mo Savasava Tiko ga ni O Taqomaka na Lomamu,” cava soti e so na sala meda saga meda savasava tiko ga kina? Ena ivunau, “Qarauna de O Vakacalai,” na cava e so na ka meda qarauna meda na kua ni vakacalai kina se meda kua tale ga ni veivakacalai kina?

⁷ Na tikina yaga cava soti o a rogoca mai na vosa veitaravi “O Ira na Dauvunau Era Doka na Nodra Cakacaka” o sa taurivaka tiko oqo ena nomu cakacaka vakavunau? A sereki na Filipai 4:8 ena ivunau “E Veitaraicake na Veivosakitaki ni Veika Vakayalo.” E vukei keda vakacava na tikinivolatabu oya meda vagolea noda veivosaki ina veika vakayalo, qai gauna cava me vakayacori kina oqori?

⁸ A kau cake mai ena ivunau “Vakararavi Vakatabakidua Vei Jiova ena Gauna Dredre Oqo” na sala e so eda rawa ni vosota kina na leqa bibi e basika, na bula dredre vakailavo, bula tautauvimate, leqa vakavuvale, kei na noda malumalumu e so eda dau valuta tiko ga. Eda na vakararavi vakacava vei Jiova nida sotava na ituvaki vaka oqori?

⁹ iYau Vou Vakayalo: Dua na ka noda marautaka na ivola vou Qarava na Kalou Dina. Na cava na nomu nanuma ni o rogoca ni sa kacivaki na inaki me na vakayagataki kina? Na cava na vuna ena yaga kina oqo me ikarua ni ivolanivuli meda vakavulica kina e so tale mera tisaipeli?

¹⁰ Eda taura tale ga ena soqo oya na ivola totoka na Toro Voleka Vei Jiova. Na cava e so na tikina talei me baleta na ivola oqo? Na iyaloyalo se droini cava soti o taleitaka kina? O vakila ni o volekati Jiova cake ena nomu sa wilika? O cei tale ena yaga vua na ivola oqo?

¹¹ Na veivakayaloqaqataki vakayalo eda gadreva tu meda tudei kina ena gauna dredre eda bula donuya oqo eda a rogoca mai na soqo ni tikina sa dromu na “Dauvunau Gugumatua ni Matanitu ni Kalou.” Me rawa ni yaga dina vei keda na isolisoli uasivi vakayalo eda rawata mai kina, e bibi meda nanuma lesu na veika eda a rogoca, meda ciqoma ena vakavinavinaka na veika a cauraki kina, da qai bulataka na veika eda vulica. (2 Pita 3:14) Ke da vakayacora oqori, eda na vakaukauataki meda yalodina tiko ga, meda dauvunau gugumatua tale ga ni Matanitu ni Kalou me vakataki Jisu Karisito na noda Turaga, qai ka oqori e vakalagilagi kina o Jiova.​—Fpai. 1:9-11.