Tokona na Nomu iVakatawa ni Vulivola ni iVavakoso

¹ Levu na sala e dau yaga kina vei keda yadudua na Vulivola ni iVavakoso. Eda veivosakitaka ena vula sa oti na itavi i koya na ivakatawa ni Vulivola ni iVavakoso. Ia na cava meda cakava meda vukei koya kina, meda tauca kina kei ira tale e so na kena yaga?

² Tiko e Veimacawa: Nira le vica toka ga na lewe ni vulivola, sa rui bibi gona na nomu kua ni dau yali mai kina. Me nomu isausau mo lakova e veimacawa. O na veitokoni ke o dau yaco totolo yani, ni na tekivutaka kina na vuli ena kena gauna o ivakatawa ni vulivola.​—1 Kor. 14:40.

³ iVakamacala Veivakauqeti: Dua tale na sala mo veitokoni kina na nomu vakavakarau yani vakavinaka kei na nomu dau vakamacala. Ena yaga ke o vakamacalataka e dua mada ga na tikina, ni oqori ena uqeta e so tale mera vakamacala. Kua ni via vakamacalataka na parakaravu taucoko. Ke uqeta na lomamu e dua na tikina, talaucaka mai oqori me bulabula kina na vuli.​—1 Pita 4:10.

⁴ Ke o lesi mo wili parakaravu ena gauna ni vuli, gumatua mo vakayacora vinaka na ilesilesi oqori. E yaga ina vuli na dau wilivola taladrodro vinaka.​—1 Tim. 4:13.

⁵ Vunau Vakaiwasewase Lailai: Levu na vanua ni vulivola e dau isotasota ni cakacaka vakavunau. Nomu tokona na ituvatuva oqori ena yaga vua na ivakatawa me liutaka vinaka na cakacaka ni veivakalotutaki. Mo raica na ituvatuva vaka oqori me gauna veiganiti vei iko mo volekati ira kina na tacimu mo qai vakauqeti ira.

⁶ Ripote ni Cakacaka Vakavunau: Dua tale na sala mo tokona kina na ivakatawa na nomu solia totolo nomu ripote ni cakacaka vakavunau ni cava na vula. Mo solia sara ga vei koya se biuta ena kena kato ena Kingdom Hall. Me qai vakayagataka na kato oqori na vunivola me soqona kina na ripote kece era sa kumuna na ivakatawa ni vulivola.

⁷ Ena marautaki sara vakalevu na yalo ni veitokoni o vakaraitaka vua na nomu ivakatawa ni Vulivola. Qai kena ilutua, mo kila tiko ni na taleitaka o Jiova na yalo o vakaraitaka oqori.​—Fpai. 4:23, NW.