Na Vulivola ni iVavakoso ​​—⁠Cava e Bibi Kina

1. A tekivu vakacava na Vulivola ni iVavakoso?

¹ Ena 1895 e dau vakatokai tu na vulivola vakaiwasewase lalai me Dawn Circles for Bible Study, oqo na vulivola ni Gonevuli ni iVolatabu, na yaca era a kilai tu kina na iVakadinadina i Jiova. E dau vulici kina na ivola na Millennial Dawn. E qai vakatokai e muri me Berean Circles for Bible Study. (Caka. 17:11) Na vulivola vaka oqo e dau caka ena vale vakaitaukei ena yakavi me ganita na iwasewase yadua. Oqo sara ga na itekitekivu ni Vulivola ni iVavakoso.

2. Eda na ‘veivakacegui’ vakacava ena vulivola ni ivavakoso?

² Veiuqeti kei na Veivukei: Nira lewe lailai ga na dau tiko ena vuli vaka oqo, e levu cake na gauna mera vakatusa kina nodra vakabauta na lewe ni vulivola. Eda na ‘veivakacegui ena vuku ni nodra vakabauta kei na noda tale ga.’​​—⁠Roma 1:​12.

3, 4. E vukei keda vakacava na kena tuvanaki na vulivola meda cakava vinaka kina noda cakacaka vakavunau?

³ E rawa ni vukei keda meda “wasea vakadodonu nai vakavuvuli dina” na noda dikeva vinaka na ivakarau ni nona veivakavulici na ivakatawa ni vulivola. (2 Tim. 2:​15) Vakadikeva qai vulica na ivakarau ni nona dau vakabibitaka na tikinivolatabu e yavutaki mai kina na vuli. Ke ganita na ivola e vulici tiko, so na gauna ena railesuva na ivakatawa na veika e sa vulici oti ena nona vakayagataka ga na iVolatabu. Na nona ivakaraitaki vinaka ena vukei keda meda vakavinakataka kina na ivakarau ni noda veivakavulici ena cakacaka vakavunau.​​—⁠1 Kor. 11:⁠1.

⁴ E sega wale ga ni liutaka na vuli na ivakatawa ni vulivola, e dodonu me liu sara tale ga ena cakacaka vakavunau. Ena tokona na ivakatawa ni cakacaka, ena tuvanaka tale ga na nodratou cakacaka vakavunau na lewe ni nona iwasewase lailai. Ena vukei ira kece na lewe ni nona iwasewase mera vakayacora vinaka na nodra itavi vakarisito, na kena vunautaki na itukutuku vinaka kei na veivakatisaipelitaki.​​—⁠Maciu 28:​19, 20, VV; 1 Kor. 9:​16.

5. Na veivuke cava era rawa ni cakava na ivakatawa ni vulivola?

⁵ Ena kauaitaka na ivakatawa ni vulivola na nodra bula vakayalo na lewe ni nona iwasewase. Ena vakaraitaka oqo ena gauna ni soqoni kei na cakacaka vakavunau. E vakaukauataki ira vakayalo tale ga ena gauna e sikovi ira kina e vale. Meda kua mada ga ni tu vakasuka ena noda torovi ira na ivakatawa ni vulivola ena gauna eda gadreva kina na veivuke vakayalo.​​—⁠Aisea 32:​1, 2.

6. (a) E vakaukauataki ira vakacava na tacida ena so na vanua na nodra dau soqoni vakaiwasewase lalai? (b) E yaga vakacava vei iko na kena tuvanaki na vulivola?

⁶ Veivakaukauataki: Era dau soqoni vakaiwasewase lalai na tacida ena vanua e dau vakatabui tu kina na cakacaka. E nanuma lesu e dua na tacida: “Dina ga ni vakatabui na cakacaka, keimami dau soqoni e veimacawa vakaiwasewase lalai, keimami lewe 10 ina 15 ena dua na iwasewase. E dau veivakaukauataki na neimami vuli iVolatabu kei na neimami veimaliwai ni oti na vuli. Keimami dau veitalanoataka na ka dredre keimami sotava, keimami kila kina ni tautauvata ga na leqa keimami sotava tiko.” (1 Pita 5:⁠9) Meda veivakaukauataki mada ga ena noda tokona na ituvatuva ni Vulivola ni iVavakoso.​​—⁠Efeso 4:​16.