Ka mo Cakava me Yaga Kina Nomu iWasewase Lailai ni Cakacaka Vakavunau
1. Na cava e dau caka tu ena Vulivola ni iVavakoso e se marautaki tiko ga nikua ena noda iwasewase ni cakacaka vakavunau?
1 O dau nanuma lesu eso na ka e yaga kina na Vulivola ni iVavakoso? E sega ni levu era dau tiko kina qai rawarawa noda veimaliwai. Eda rawa ni veitokani kina kei ira era na vukei keda vakayalo. (Vkai. 18:24) Na ivakatawa ni vulivola e kilai ira vinaka na lewena na iwasewase e qarava qai rawa kina ni vakayaloqaqataki ira yadua. (Vkai. 27:23; 1 Pita 5:2, 3) Eda se rawa ni marautaka tiko ga nikua na veika qori ena noda dui iwasewase lailai ni cakacaka vakavunau.
2. Eda na rawa vakacava ni vakaliuliu meda veitokani kei ira era na vukei keda vakayalo ena noda iwasewase lailai ni cakacaka vakavunau?
2 Vakaliuliu: Na iwasewase lailai ni cakacaka vakavunau e va ga na levu ni iwasewase ni vulivola e liu. Nida “yalovata” ena cakacaka vakaitalatala kei ira tale eso, eda na veivolekati sara. (Fpai. 1:27) E vica ena nomu iwasewase o sa cakacaka oti kei ira? O rawa ni “lomasavu” mo cakacaka kei ira tale eso? (2 Kor. 6:13) Kena ikuri, de dua eda na sureta ena so na gauna e dua ena noda iwasewase ena yakavi ni noda Sokalou Vakavuvale se na dua na kakana eda vakarautaka. Ena so na ivavakoso, e dau tuvanaki na gauna me veisureti kina e dua na iwasewase lailai ni cakacaka vakavunau vua e lai vunau yani ena ivavakoso. Ena macawa mera veisureti kina, era na vakarautaka e dua na kakana na lewe ni iwasewase ra qai dau veivakayaloqaqataki, ke mani tiko kina o koya e lai vunau yani se sega.
3. Na cava eso na sala eda rawa kina ni vakatawani ena noda iwasewase lailai ni cakacaka vakavunau?
3 Nikua e sa vakarua ga noda soqoni vakaivavakoso e veimacawa, e sega ni kena ibalebale qori ni sa na lailai ga na gauna mera vakatawani kina na dautukutuku. Era lesi na ivakatawa ni wasewase mera vakayaloqaqataki ira na lewe ni iwasewase yadua ra qai vakavulici ira ena cakacaka vakaitalatala. Ke se sega ni tukuna na ivakatawa ni nomu iwasewase mo drau cakacaka vata ena cakacaka vakaitalatala, vakacava mo kerea sara ga vua mo drau cakacaka vata? Kena ikuri, na ivakatawa ni cakacaka ena vunau vata kei na dua na iwasewase lailai ena dua na muanimacawa e veivula. Ena ivavakoso lalai e vica ga na kena iwasewase ni cakacaka vakavunau, ena rawa ni tuvanaka na ivakatawa ni cakacaka me sikova vakarua na iwasewase kece ena dua na yabaki. O dau tuvanaka mo lako ena cakacaka vakaitalatala ena gauna e veisiko yani kina na ivakatawa ni cakacaka?
4. (a) E dau tuvanaki vakacava na soqoni ni cakacaka vakavunau? (b) Na cava meda lomasoli kina me vakayagataki na noda vale me caka kina na soqoni ni cakacaka vakavunau?
4 E dau vinaka me duidui na vanua era sota kina na iwasewase lailai ena muanimacawa. Ni duidui na vanua me dau caka kina na sota qai via tautauvata na gauna me dau caka kina, ena rawarawa vei ira na dautukutuku mera lako ena vanua ni sota, de dua ena yalava tale ga ni cakacaka vakavunau. Era rawa ni wasei totolo na dautukutuku, ra gole sara ina yalava. Ena rawarawa tale ga vua na ivakatawa ni iwasewase me qaravi ira vinaka na lewe ni nona iwasewase. Ia ena so na ituvaki, ena rairai vinakati me cokovata e rua se vica na iwasewase. Ke caka na vunau vakaivavakoso ena imatai ni Vakarauwai ena dua na vula se ni oti na Vuli Vale ni Vakatawa, e dau vinaka mera dabe vata ga na lewe ni dua na iwasewase lailai me qai soli e vica na miniti vua na nodra ivakatawa me tuvanaka na nodra cakacaka ni bera ni caka na masu.—Raica na kato “E Rawa ni Vakayagataki Nomu Vale?”
5. Sa sega tale ni muri na ituvatuva ni Vulivola ni iVavakoso, ia na cava meda nuidei kina?
5 Sa sega tale ni muri na ituvatuva ni Vulivola ni iVavakoso, ia se vakarautaka tiko ga o Jiova na ka kece eda gadreva meda vakayacora kina na lomana. (Iper. 13:20, 21) Eda na sega ni leqataka e dua na ka ni na vukei keda o Jiova. (Same 23:1) Eda na vakalougatataki vakalevu ena noda iwasewase lailai ni cakacaka vakavunau. Ke da dau vakaliuliu da qai ‘kaburaka vakalevu,’ eda na ‘tatamusuki tale ga vakalevu.’—2 Kor. 9:6.
[Kato ena tabana 6]
E Rawa ni Vakayagataki Nomu Vale?
E tuvanaka eso na ivavakoso mera cokovata eso na wasewase lalai ni sega ni levu na vale me caka kina na sota. E wili tale ga ena ituvatuva ni ivavakoso na soqoni ni cakacaka vakavunau, e ka dokai gona me vakayagataki na noda vale me caka kina qori. Vakacava e rawa ni vakayagataki na nomu vale? Kua ni tusuka ni cakava qori ke sega ni vinaka sara na nomu vale. Era na raica na qase ni ivavakoso na vanua e tiko kina na nomu vale kei na so tale na ituvaki, qori e tautauvata ga kei na ka era cakava nira digitaka na vanua me caka kina na vulivola. Ke o vinakata me caka na sota ena nomu vale, mo tukuna vua na nomu ivakatawa ni iwasewase lailai.