Era Kauaitaki Keda Yadudua na iVakatawa ni Vulivola
1 E nakiti na Vulivola ni iVavakoso ‘mera na vukei cake kina vakalevu na lewe yadua ni iwasewase mera toso vakayalo. Oqo na ivakaraitaki ni yalololoma i Jiova kei na nona dau karoni ira nona tamata.’ (om Fn t. 75; Aisea 40:11) Na itavi bibi dina e tiko vua na ivakatawa ni vulivola me baleta na noda kauaitaki yadudua na lewe ni vulivola.
2 Ena Gauna ni Vulivola: E dau lailai toka ga na iwasewase ni vulivola me rawarawa kina vua na kena ivakatawa me kilai ira vinaka na lewena. (Vkai. 27:23) Ena veimacawa, e dau rawa na veitalanoa ni se bera se ni sa oti na vuli. Ena loma gona ni dua na vula, de rawa ni tovolea na ivakatawa me veivosaki kei ira kece na lewe ni nona iwasewase. Ena yaga oqori vei ira na lewe ni vulivola nira na sega ni lomaririko kina ni torovi koya mera kere veivuke ke ra sotava na leqa se ra gadreva na veivakayaloqaqataki.—Aisea 32:2.
3 Ena tovolea na ivakatawa ni vulivola me uqeti ira kece na lewe ni iwasewase mera vakaitavi ena vuli. Dua na sala e cakava kina oqori ke malumu ga na rorogo ni domona kei na itautau ni nona vosa ni veivakavulici tiko. (1 Ces. 2:7, 8) E dau tovolea mera vakaitavi kece na lewe ni vulivola ena saumi ni taro, wili kina o ira na lalai. Ke ra dau mamadua e so, de vinaka mera kerei rawa e liu mera wilika e dua na tikinivolatabu se me lesi vei ira e dua na parakaravu mera vakamacala kina. Se rawa nira vakavulici mera vakamacala ena nodra vosa ga.
4 Ke dauveiqaravi vakaitalatala na ivukevuke i koya na ivakatawa ni vulivola, ena tuva o koya me taura na vuli na nona ivukevuke ena veiyarua na vula. Oqo ena rawa kina vua na ivakatawa me dikeva na ivalavala ni nona veivakavulici qai vakasalataki koya kina ke gadrevi. Sa ituvatuva totoka dina oqo mera vukei kina na tacida mera vakavinakataka nodra iwalewale ni veivakavulici!—Taito 1:9, NW.
5 Ena Cakacaka Vakavunau: E dua na itavi levu i koya na ivakatawa ni vulivola me liutaka sara ga na cakacaka vakavunau. (Tiko 27:16, 17) Ena biuta e dua na ituvatuva veiganiti ni cakacaka vakavunau, qai saga me vukei ira kece na lewe ni nona iwasewase mera cuqena na cakacaka vakavunau. (Efeso 4:11, 12) Ena tovolea me cakacaka vata kei ira kece na lewe ni nona vulivola. Ena tokona tale ga na ivakatawa ni cakacaka ena kena tuvai mera dau biubiu vata na dautukutuku vou era gadreva na veivuke kei na so tale na dautukutuku matua mera vakavinakataka cake kina na dautukutuku vou e so na basoga ni nodra cakacaka vakavunau.
6 E iVakatawa Dau Loloma: Na ivakatawa ni vulivola e dau kauaitaki ira sa lailai ga na ka era rawata ena cakacaka vakavunau baleta na kedra ituvaki vakayago. Oqo e baleta beka nira sa qase sara, se ra sa davo tu ga mai vale nira sa sega ni yavala rawa, se o ira era davo vakalekaleka ena vuku ni mavoa se tauvimate bibi. Ena raica o koya mera kila tiko o ira vaka oqori ni rawa nira ripotetaka ga, ke lailai sara e 15 na miniti, ke ra sega ni yacova na dua na aua ena dua na vula. (Na Komiti ni Cakacaka ena iVavakoso ena raica se ganiti cei dina me ripotetaka na aua oqori.) E kauaitaki ira tale ga era sa dautukutuku mate ena nona iwasewase na ivakatawa ni vulivola, qai saga me vakabulabulataki ira tale vakayalo.—Luke 15:4-7.
7 Sa dua na ka vinaka nira tu na ivakatawa ni vulivola vaka oqo era dau veikauaitaki dina! Na nodra dau veikauaitaki vaka oqori e yaga ena noda “yacova kece sara kina na duavata e na noda vakabauta . . . , me da tamata yalomatua ka ucuya na i vakarau taucoko i Karisito.”—Efeso 4:13.