Eda na Marau Nida Tokona na Cakacaka Vakavunau

¹ Ni talai ira yani na le 70 na tisaipeli o Jisu mera lai vunau, a vakarautaki ira ena ka mera kaya, wasei ira mera lako yarua, qai vakamatatataka na vanua mera vunau kina. Era marautaka nodra cakacaka baleta ni tuvanaki vakavinaka. (Luke 10:1-17) Nikua tale ga, era vakarautaki na tamata ni Kalou, ra tuvanaki vakamatau, ra vakayaloqaqataki tale ga nira sota vata mera vakaitavi ena cakacaka vakavunau.

² Ra Liu Sara ga na Qase: E bibi na nodra itavi na qase me rawa kina ni dau tokoni na cakacaka vakavunau. E liu sara ga na ivakatawa ni cakacaka ena nona tuvanaka na cakacaka vakavunau ena loma ni macawa. Na ivakatawa ni vulivola e nona itavi me qarava na cakacaka vakavunau ni nona iwasewase, vakauasivi ena muanimacawa. Ke mani sota vata na ivavakoso taucoko ena cakacaka vakavunau, me vaka beka ni oti Na Vuli Vale ni Vakatawa, na ivakatawa ni vulivola yadua me qai raica na veika era gadreva na lewe ni nona iwasewase lailai.

³ ‘Caka Vinaka, Tuvalaki Vakamatau’: O koya e lesi me liutaka na cakacaka vakavunau e dodonu me tekivu ena kena gauna, me qai raica me 10 se 15 ga na miniti na dede ni veivosaki. Ni bera ni tinia na veivosaki ena masu, e vinaka me wasewasei ira rawa na lai vunau kei na yalava mera cakacaka kina (vakavo ke sa lewai mera qai raica ga nodra dui iwasewase na ivakatawa ni vulivola, me vaka e sa cavuti oti). Oqo era na sega kina ni lai kumukumuni tu ena yalava na veitacini, ni na rawa ni beci kina noda cakacaka. E salavata tale ga oqo kei na ivakasala i Paula: “Na ka kece ga me caka sara vaka vinaka ka tuvalaki vakamatau.” (1 Kor. 14:40, VV) O ira kece na tiko ena sota ni cakacaka vakavunau e dodonu mera tokona na ituvatuva oqo ena nodra yaco totolo yani, ra tokoni koya e veiliutaki, ra qai totolo ena nodra lako yani ina yalava ena gauna ga era wase oti kina.

⁴ Vakaduavatataki Keda: Noda veitomani ena cakacaka vakavunau e dua na sala eda veikilai vinaka kina kei ira na tacida ena ivavakoso. So na gauna eda dau digia ga na tacida me tomani keda ena cakacaka vakavunau, ia e daumaka sara kevaka me qai lai lewa ga o koya e veiwasei. E rawa ni lesi meda cakacaka vata kei na dua eda sega ni veikilai vinaka sara, oqo e dua na gauna vinaka meda ‘dolava kina vakalevu na yaloda’ ena noda vakarabailevutaka na noda loloma.​—2 Kor. 6:11-​13, VV.

⁵ Noda cakacaka vakavunau vata kei ira na tacida ena vakaduavatataki keda, eda na “veitokani sara kina kei ira e na cakacaka dina.” (3 Joni 8, VV) Meda tokona mada ga ena kena levu duadua eda rawata!