Meda Vakayagataka Vinaka na Noda iVola

1, 2. Na cava era kaya e so me baleta na noda ivola? Na taro cava e tarogi kina?

¹ “Tekivu ena 1965 au sa dau vakawilika tu mai na nomuni ivola. Au dau raica tale ga na iVolatabu niu wiliwili tiko, na ka kece e volai tu ena nomuni ivola e salavata sara ga kei na iVolatabu. Au dau via kila tu na ka dina me baleta na Kalou kei Jisu, au rawa ni tukuna sara ga vakadodonu niu sa kunea tiko na kena isau ena nomuni ivola vaka kina ena iVolatabu.” Oqo na ka e vola e dua na turaga ina itikotiko liu ni iVakadinadina i Jiova. A kerea tale ga ena ivola oya me vuli iVolatabu.

² Me vaka ga na turaga oya, e vica vata na milioni na tamata e vuravura era dau vakavinavinakataka na ivola vakaivolatabu e vakarautaka na “dauveiqaravi yalo dina ka vuku.” (Maciu 24:​45, VV) Dua na ka na iwiliwili levu ni ivola e tabaki e veiyabaki me vukei ira na tamata lomadina mera “mai kila sara nai vakavuvuli dina.” (1 Tim. 2:⁠4) Sala cava eda na vakayagataka vinaka kina na noda ivola?

3. Sala cava eda na sega ni vakasabusabutaka kina na noda ivola?

³ Kua na Vakasabusabu: Ni toso na gauna sa rawa ni levu na ivola e tu vei keda eda sega ni veisoliyaka rawa. Na cava eda rawa ni cakava meda kua kina ni vakasabusabutaka? Meda yalomatuataka noda taura na ivola eda veisoliyaka ena cakacaka vakavunau. Eda rawa ni taura ga e dua se rua na ilavelave, nida sa solia oti na ilavelave oqori e rawa nida lai kauta tale mai e so. Ena sega kina ni levu na ivola era bini tu e vale. Ke bini tale tu ga e vale na ivoladraudrau era se bera ni soli, e vinaka meda vakalailaitaka na ivoladraudrau eda dau taura ena ivavakoso.

4. Na cava e rawa ni caka ke sa bini tu na ivola ena ivavakoso?

⁴ iVola Era Bini Tu: Ke ra bini tu e so na ivola ena ivavakoso, na tacida e qarava tiko na ivola (literature coordinator) me veitaratara kei na ivavakoso voleka de ra vinakata e so na ivola oqori. E rawa nira solia na ivola makawa o ira na dautukutuku vei ira na wekadra era sega ni vakabauta, vei ira na vuli iVolatabu, kei ira e so tale. O ira na se qai tekivu soqoni vata tiko kei na ivavakoso era na rairai vinakata na ivola makawa oqo mera biuta ena nodra laibri.

5. Eda na vakaraitaka vakacava nida vakavinavinakataka na noda ivola?

⁵ Na inaki ni noda ivola mera vukei kina na tamata yalodina mera vulica e levu na ka me baleti Jiova kei na nona inaki totoka. Me vaka nona a sega ni vakasabusabutaka o Jisu na kakana e vo ena nona vakani ira vakacakamana na vica na udolu, e noda inaki tale ga meda vakayagataka vinaka na ivola e vakarautaki mai. (Joni 6:​11-​13) Na itukutuku ni veivakabulai e tu ena noda ivola ena sega ni uqeti ira na tamata lomadina kevaka eda binia tiko ga e vale, se tawa tiko ga ena noda kato ni ivola. E dodonu gona meda vakasamataka vakayalomatua na noda lai taura mai na ivola meda veisoliyaka ena cakacaka vakavunau, meda vakayagataka vinaka me rawa ni yaga vei ira e so tale.​​—⁠Fpai. 4:⁠5.