Porokaramu Vou ni Siga ni Soqo Lavotaki

E binikasauru na ivakamacala e sa tu ena gauna oqo ena ka meda cakava me bulabula kina na yagoda, me rawa nida marautaka na bula, da qai bula balavu tale ga. Ia, o koya e bibi cake sara na ituvaki ni lomada. E veiganiti kina na usutu ni porokaramu ni siga ni soqo lavotaki e tekivu ena Sepiteba 2003: “Qaravi Jiova ena Lomamu Taucoko.” (1 Vei. 28:9, NW) Cava e so na ka eda vakanamata meda vulica kina?

 Na ivakatawa ni tabacakacaka ena vosa ena ulutaga “Vukea e So Tale Mera Qaravi Jiova ena Loma e Marautaka.” Ena vakabibitaki ena veitarotarogi na marautaki ni kena vakabulabulataki na tataleitaki kei na noda vuli iVolatabu kei ira na via qaravi Jiova. Sega ni vakabekataki nira na vakacegui ra vakayaloqaqataki tale ga o ira kece na tiko ena soqo oqo ena nona imatai ni vunau na mata mai na valenitabana ena ulutaga, “Taqomaka na Lomada Nida Bula Tu ena Vuravura ni Leqa.” Na vunau ni papitaiso ena mai vakacavara na porokaramu ena mataka.

 Ni oti na vakasigalevu na ulutaga “Dodoliga Meda Veivuke,” e veivosakitaka na sala e rawa nida veivuke kina. Na cava e rawa nira cakava na itubutubu mera taqomaki luvedra kina mai na veivakamuai cala ra qai vukei ira mera toro volekati Jiova? Ena vakamacalataki ena ulutaga “Vukea na Luvemu Mera Rekitaki Jiova” e so na vakatutu yaga ena vakatasuasuataki tale ga.

 Eda dau vakayagataka vinaka beka na ka kece e vakarautaka o Jiova me vakavinakataka tiko ga na ituvaki ni lomada? Na iotioti ni ulutaga ena vosa kina na mata mai na valenitabana, “Qaravi Jiova Tiko ga ena Lomamu Taucoko,” ena vakamacalataki kina e va na tikina bibi ni noda ituvatuva ni kana vakayalo. E vakacava na levu ni gauna eda dau masu vagumatua kina, vulica na Vosa ni Kalou, vunau vagumatua, vaka kina na sosoqoni kei ira na lotu Vakarisito? E rawa beka nida vakavinakataka e so na tikina oqo?

 E veisureti tu o Jiova: “Mo vagolea na lomamu ki nai vakavuvuli, kei na daligamu ki na vosa vuku.” (Vkai. 23:12) Mo tuvanaka rawa ena gauna oqo mo tiko ena siga ni veivakavulici vakaivolatabu oqori. Ni o cakava vaka kina ena vakaukauataki iko mo qaravi Jiova tiko ga ena lomamu taucoko kei na yalo e marau.