iVola Mai na Valenivolavola ni Tabana

Kemuni na Dautukutuku ni Matanitu ni Kalou:

“Na Kalou ga sa qai vakatubura.” (1 Kor. 3:6) Dua na ka marautaki ni raici na tubu e sa yaco tiko e veiyasa i vuravura! E tubu na kedra iwiliwili na dautukutuku ena levu na vanua ena yabaki vakacakacaka ni 2003. E dina ni kauai na tabana e Viti ena kena sega ni dau caka wasoma na cakacaka vakavunau ia a ripotetaki e so na kena itukutuku vinaka. E tubu na iwiliwili ni vuli iVolatabu, qai vakabauti ni nodra a tiko ena iVakananumi e lewe 8,166 ena rawa kina ni levu tale era mai tomani keda ena cakacaka vakavunau ena dua na gauna mai muri.

E levu nodra veitosoyaki na tamata e vuravura, mani gadrevi kina mera tarai ena nodra dui vosa. Kena ivakaraitaki, e ripotetaki mai Mereke ni sa tauyavutaki kina na ivavakoso kei na iwasewase lalai ena 37 na vosa me ikuri ni rua na vosa e vakayagataki vakalevu ena vanua oya, na vosa vakavalagi kei na kena vakasipeni. Meda saga gona mera tarai kece na dui matatamata e ke, wili kina o ira era vosataka na vosa vakilivati, vakarotuma kei na vakatuvalu, baleta nira sa tiko rawa e Suva.

E bibi noda kila na kena tabaki na ivola mai Mereke. Me vakarautaki gona na ivola e baleta tiko na cakacaka vakavunau, e dikevi ni sa tubu tiko ga e veiyasa i vuravura, sa vakalevutaki kina na misini ni tabaivola ena Watchtower Farms, volekati Wallkill e Niu Yoka. E toso vinaka tiko na kena vakalevutaki na vanua me biu kina na misini ni cakacaka, e rauta ni tolu na eka. Oqo e tautauvata e 30 na Kingdom Hall! E sa lalawataki tale ga me na voli e rua na misini vou lelevu ni tabaivola ena itekivu ni 2004. Rau na dui tabaka ruarua na misini oqo e 25 na ivoladraudrau ena dua ga na sekodi. Ena vakaduri tale ga ena 2004 na misini vou ni dabani ivola kei na misini e vakarautaka na kena vakau. Oqo ena vakalevutaka na iwiliwili ni ivola e tabaki qai lailai wale ga era na vakacakacakataki kina.

Ni tekivutaki na yabaki vakacakacaka ni 2004, keimami duavata kei kemuni ena masu ni na ‘vakatubura tiko ga’ o Jiova.

Tacimuni,

Valenivolavola ni Tabana e Viti