iVola mai na Valenivolavola ni Tabana e Viti

Vei Kemuni na Dautukutuku ni Matanitu ni Kalou:

E marautaki dina na noda raica lesu na ka e sa rawati ena yabaki vakacakacaka sa oti. Ena ivola vaka oqo e volai ena yabaki sa oti, a tukuni yani kina ni sa vakadonui me vakalevutaki na valenitabana. Ia ena gauna oqo, e sa toso sara tiko na kena vakalevutaki na Peceli, sa tara oti tale ga na Kingdom Hall. Na Kingdom Hall oqo e toka ena vanua erau sota kina na Anand Street kei na Robertson Road, e Suva. Era tara na Timi ni Dautara Kingdom Hall, era veivuke tale ga kina e so era bolecakacaka mai vanuatani. Na valenisoqoni totoka oqo e vakacaucautaki dina kina na yaca i Jiova.

Na gauna e tara tiko kina na Kingdom Hall, a caka tale ga e so na cakacaka me vakaukauataki kina na lalaga kei na delavuvu ni valenivolavola. Sa caka oti oqori, sa boro vou tale ga na valenivolavola qai rua tale na rumu e caka vou e loma.

Ena Sepiteba ni yabaki sa oti, e dua na kabani ni taravale e Suva e konitarakitaki me tekivutaka na cakacaka ni kena tara na vale ena vanua lala e toka ravita na vale e icili tiko ena gauna oqo, na tikiniqele oqo e toka ena kedrau tadrua na gaunisala na St. Fort Street kei na Waimanu Road. Ena gauna e tabaki kina na ivola oqo, sa na oti na nodratou cakacaka na kabani ni taravale. Nikua sa duri tu kina e rua na vale vou, e sa caka oti na kena katubaleka kei na katubalevu, sa rawa ni lokataki tale ga. Ia se levu tale tu na ka me caka me vaka na cakacaka vakamatai ena loma ni rumu, nodra cakacaka na palama, na kena vakalivalivataki, na tei ni kau, kei na kena boro. E namaki tiko me na qai vakacavari na cakacaka ni bera ni cava na vula o Okosita ena yabaki vakacakacaka ni 2006.

Na imatai ni vale, na kena e ka lailai vei rau, ena tiko kina na rumu era dau ciqomi kina na vulagi, kei na valenivolavola ni so tale na tabana ni cakacaka. Na ikarua ni vale e taba tolu ena tiko kina na valenikuro, na valenikana, na laibri, kei na tini tale na rumunimoce. E vakavaletaki na sala e semati rau na rua na vale vou oqo kei na icili makawa.

E levu era bolecakacaka mai me rawa kina ni vakalevutaki na valenitabana. Ena gauna oqo era tiko e ruasagavulukalima na bolecakacaka era gole mai valagi, eda vakavinavinakataka na yalo ni nodra vakuai ira mera mai veivuke! Era veivuke tale ga vakalevu ena cakacaka oqo o ira ga na tacida e ke. Eda vakavinavinakataki Jiova ena nona uqeti ira na nona tamata mera soli ira vakarawarawa. E ka ni veivakalougatataki dina noda rawa ni veimaliwai kei ira na mataveitacini dau veikauaitaki vaka oqo ena vuravura raraba! (1 Pita 2:​17) Ni se levu tale tu na ka me caka, ke o via vakaitavi, volavola mai mo taroga na bolecakacaka ena loma ga ni dua na gauna e tuvanaki tu e Peceli. Era gadrevi vakalevu ga na cauravou ena 12 tale na vula mai oqo.

E levu tale ga na cakacaka vinaka e sa vakayacori tiko ena cakacaka vakavunau, e laurai ni rawa ni vakilai na tubu. E veivakauqeti na kena sa tubu tiko ga na levu ni vuli iVolatabu e vakayacori tiko ena gauna oqo. A ripotetaki mai ena vula o Maji 2005, na iwiliwili levu duadua ni veisikovi lesu. Nida saga meda lesuvi ira tale na taleitaka na itukutuku vinaka da qai kauaitaki ira, eda kila ni na vakaikuritaka nona veivakalougatataki o Jiova.

Ni railesuvi na ka e sa rawati ena cakacaka vakavunau kei na taravale e caka tiko oqo, e vakacaucautaki dina na kena qacoi tiko na cakacaka me vakatetei kina na itukutuku ni Matanitu ni Kalou! (Vkai. 3:​9, 10) Me vakalougatataka mada ga o Jiova na noda sasaga ena duavata meda ‘vakacaucautaka na nona lagilagi.’​​—⁠Efeso 1:​12, VV.

Tacimuni,

Valenivolavola ni Tabana e Viti