Saga Mo Drau Veivolekati kei Jiova
1. Na cava e raica rawa e dua na tacida yalewa me baleta nona bula vakayalo?
1 “Me tekivu mai na gauna au tiko kina ena dina, sa rairai sivia oqo e 20 na yabaki na kena sa ivakarau tu ga ni ka vei au na lako ena soqoni vakarisito kei na cakacaka vakavunau,” e kaya e dua na tacida yalewa. Ia, e tomana: “Au sa qai kila ni sega ni rawa ni veivakacegui ena gauna dredre noqu cakava wale tu ga na veika oqori, dina ga ni rau bibi . . . au raica ni dodonu meu veisautaka noqu rai qai muria e dua na porokaramu ni vuli iVolatabu meu rawa ni kilai Jiova vakavinaka kina, meu lomani koya, meu marautaka tale ga na veika e cakava na Luvena vei keda.”
2. Na cava e bibi kina meda sasagataka meda veivolekati kei Jiova?
2 E gadrevi na sasaga me qai dei noda veiwekani kei Jiova. Oqo e sega ni baleta wale ga na noda vakamuria wale tu ga e dua na ituvatuva ni cakacaka vakarisito. Kevaka eda sega ni masuti Jiova vakalevu, lakolako sa na rawa ni vaka na itokani eda sa sega tu ni veitaratara. (Vkta. 2:4) Meda raica mada se vukei keda vakacava na noda dau vuli iVolatabu vakataki keda kei na masu meda volekati Jiova kina.—Same 25:14.
3. Na iwalewale cava eda na taurivaka ena noda vuli vakataki keda meda volekati koya kina na Kalou?
3 Bibi na Masu kei na Vakasama Titobu: Ena sega ni tara na lomada na noda vuli vakataki keda ke toqai wale ga na veitikina bibi se wiliki na tikinivolatabu era sega ni lavetaki. E dodonu meda vakasamataka na ka e vakamacalataka tiko me baleti Jiova, nona vakatagedegede, kei na nona itovo. (Lako 33:13) Ena tara na lomada na noda kila na veika vakayalo, qai uqeti keda oqori meda vakasamataka na noda bula. (Same 119:35, 111) Me inaki ni noda vuli vakataki keda meda veivolekati kina kei na Kalou. (Jeme. 4:8) Na vuli vagumatua ena gadrevi kina na gauna kei na vanua vinaka. E gadrevi tale ga me dau caka e veigauna kece. (Tani. 6:10) Ke o sa rui osooso, o dau biuta beka vakatikitiki na gauna ena veisiga mo vakasamataka kina vakabibi na itovo uasivi i Jiova?—Same 119:147, 148; 143:5.
4. E vukei keda vakacava na masu kei na noda vuli vakataki keda meda veivolekati kina kei Jiova?
4 E tiki bibi ni noda vuli vakataki keda na noda masu mai vu ni lomada. E vinakati na yalo tabu ni Kalou me rawa ni uqeti na lomada meda “qarava vinaka kina na Kalou e na yalomatua kei na rere.” (Iper. 12:28) O koya gona, ni se bera nida vuli, meda kerea na yalo tabu i Jiova. (Maciu 5:3, NW) Nida vakasamataka vakatitobu na iVolatabu da qai vakayagataka na ivola e vakarautaka na isoqosoqo i Jiova, eda sa dolava sara tiko ga kina na lomada vei koya. (Same 62:8) Na iwalewale ni vuli vaka oqo e tiki ni noda sokalou eda vakaraitaka kina nida lomani Jiova da qai vaqaqacotaka noda veiwekani kei koya.—Juta 20, 21.
5. Na cava e bibi kina meda dau vakasamataka vakabibi na Vosa ni Kalou e veisiga?
5 Me vaka ga na ka e dau yaco ena veiwekani tale e so, e dodonu me karoni tiko ga na noda veiwekani kei Jiova ena veigauna taucoko me dei tiko ga kina. Meda dau vakatikitikitaka gona na gauna ena veisiga meda rawa kina ni toro volekata na Kalou, nida kila deivaki ni na toro volekati keda tale ga mai o koya.—Same 1:2, 3; Efeso 5:15, 16.