“Dolava Vakalevu na Yalomuni”
1. Na cava e noda itavi yadudua?
1 E noda itavi yadudua na mataveitacini lotu Vakarisito meda vakabulabulataka na veilomani ena ivavakoso. (1 Pita 1:22; 2:17) Ena rawati ga oqori nida ‘dolava vakalevu na lomada’ meda veilomani. (2 Kor. 6:12, 13, VV) Na cava e bibi kina noda saga meda kilai ira vinaka na tacida lotu Vakarisito?
2. Na cava e bibi kina meda bucina na veitokani kei ira eda vakabauta vata?
2 Qaqaco Vinaka na Veitokani: Nida kilai ira vinaka eda vakabauta vata, ena talei sara ga vei keda na nodra vakabauta, nodra dau vosota, kei na so tale na nodra itovo vinaka. Eda na sega kina ni kauaitaka vakalevu na nodra malumalumu, qai qaqaco vinaka tiko ga na ivau ni noda veitokani. Noda veikilai vinaka gona, ena rawarawa kina noda veitaraicake da qai dau veivakacegui. (1 Ces. 5:11) Eda na vu ni ‘veivakacegui’ da qai vorata na idre dukadukali ni vuravura i Setani. (Kolo. 4:11) Nida sa bula dredre tu ena iotioti ni veisiga oqo, eda marau nira tu ena keda maliwa na itokani vinaka era qaravi Jiova!—Vkai. 18:24.
3. Eda na vakaukauataki ira vakacava e so tale?
3 Nida sotava na veika dredre, era dau veivakaukauataki ra qai veivakacegui na itokani voleka. (Vkai. 17:17) E nanuma lesu e dua na tacida yalewa e dau yalolailai vakavuqa: “Era dau vakacaucautaki au e so na noqu itokani, meu kua kina ni dau yalolailai tiko.” Era isolisoli mai vei Jiova na itokani vaka oqori.—Vkai. 27:9.
4. Eda na veikilai vinaka vakacava kei ira e so tale ena ivavakoso?
4 Mo Dau Veikauaitaki: Meda kauaitaki ira vakacava na mataveitacini? Me ikuri ni nomu kidavaki ira e so tale ena soqoni vakarisito, saga me titobu na ivakarau ni nomu veitalanoa kei ira. Kua sara ni siova na veika e baleti koya, ia mo vakaraitaka ga na yalo ni veikauaitaki. (Fpai. 2:4; 1 Pita 4:15) Dua tale na sala meda veikauaitaki kina, oya na noda sureti ira mera mai kana e vale. (Luke 14:12-14) E rawa tale ga ni o tuvanaka mo cakacaka vakavunau kei ira. (Luke 10:1) Noda vakaliuliu meda kilai ira vakavinaka na tacida, eda sa tara cake sara tiko ga na veivakaduavatataki ena ivavakoso.—Kolo. 3:14.
5. Na cava e dua na sala o na vakarabailevutaka kina na nomu veikilai kei ira e so tale?
5 Eda digi ira beka ga na noda itokani baleta nida yabaki vata se ni tautauvata na ka eda taleitaka? Me kua mada ga ni vakalatilati na rai vaka oqori ena noda veitokani kei ira e so tale ena ivavakoso. Erau bucina e dua na ivau ni veitokani dredre o Tevita kei Jonacani, vaka kina o Ruci kei Neomai, dina ga ni duidui na nodratou yabaki ni bula kei na nodratou isususu. (Ruci 4:15; 1 Sam. 18:1) O rawa beka ni vakarabailevutaka na nomu veikilai kei ira e so tale? O na vakila kina na veivakalougatataki e tawanamaki.
6. E yaga vakacava na noda vakarabailevutaka noda lomani ira na mataveitacini?
6 Nida vakarabailevutaka na noda lomani ira e so tale, eda na vu ni veivakaukauataki da qai tara cake na veisaututaki ena ivavakoso. Kena ikuri, e vakalougatataki keda o Jiova nida dau lomani ira na tacida. (Same 41:1, 2; Iper. 6:10) Me nomu isausau mada ga mo kilai ira vakavinaka na mataveitacini ena kena levu ga o rawata.