iVakarau Vou ni Kena Railesuvi na Porokaramu ni Soqo e Baleta na Tabacakacaka
Ni sa qai torosobu tiko ga na vuravura ca oqo e liutaka tiko o Setani, e vakaukauataki keda o Jiova meda “biuta tani na i tovo kece ga e sega ni i tovo vakalou kei na gagadre ca vakayago, ka me da yalomatua, yalosavasava ka i tovo vakalou e na vuravura oqo.” (Taito 2:12, VV) E levu na ka e vakarautaka mai ena nona vakayagataka “na dauveiqaravi yalo dina ka vuku,” e rua oya na porokaramu ni soqo ni tabacakacaka kei na siga ni soqo lavotaki. (Maciu 24:45, VV) Na soqo vaka oqo e veivakaukauataki dina vakayalo!
Me rawa nida nanuma tiko ga da qai bulataka na ka eda vulica kina, e sa tuvanaki gona e dua na ituvatuva vou me railesuvi kina na soqo ruarua oqo, ena qai vakayacori ena yabaki vakacakacaka ni 2005. E koto ena tabana e 5-6 ni itoma oqo e so na ulutaga ni porokaramu, kei na taro me railesuvi kina. Ena veivosakitaki oqo ena Soqoni ni Cakacaka ni bera vaka kina ni sa oti na soqo. Ena vakayacori vakacava?
Dua se rua na macawa ni bera na soqo ni tabacakacaka, ena dua na itavi ena Soqoni ni Cakacaka e yavutaki ena ulutaga “Porokaramu Vou ni Soqo ni Tabacakacaka.” Na inaki ni itavi oqo meda nanamaki kina ena siga oqori. Ena veivosakitaki tale ga na taro ni railesuvi, mera uqeti kece na vakarorogo mera vakavola na veitikina bibi era rogoca, ni na caka na railesuvi ni oti e vica na macawa mai na gauna e caka kina na soqo ni tabacakacaka.
Vica na macawa ni oti na soqo ni tabacakacaka, ena railesuvi na porokaramu ni imatai ni siga ni soqo me 15 na miniti ena Soqoni ni Cakacaka. Ena macawa e tarava ena 15 tale na miniti me railesuvi kina na porokaramu ni ikarua ni siga. Na taro ni railesuvi ena itoma oqo ena yavutaki sara ga kina na veivosaki. Me yavutaki tale ga na railesuvi ena yaga ni veika e rogoci. E rawa nira tuvanaka na qase me vakaleleka, se me veiveisau na ituvatuva ni Soqoni ni Cakacaka me rawa kina ni vakayacori na railesuvi.
Na ituvatuva oqo ena caka tale ga ena siga ni soqo lavotaki, ia ena railesuvi ga vakadua na porokaramu kece me 15 na miniti. Meda maroroya kece na itoma oqo, me rawa ni yaga kina vei keda na ivakasala vinaka e vakarautaka mai o Jiova.—Aisea 48:17, 18.