Vukei Ira na Dau Taura na iVoladraudrau Vovou Mera Tataleitaki
1. Era na rawa ni tataleitaki vakacava o ira na sa dau taura tiko na ilavelave vovou kece ni ivoladraudrau?
1 Levu na tamata eda sotava ena cakacaka vakavunau era dau taleitaki keda, ra taleitaka tale ga na noda ivola, ia era sega ga ni via vuli iVolatabu. Dua na sala eda rawa ni vukei ira kina oya na noda kauta vei ira na ivoladraudrau vovou kece. Ni o sa solia na ivoladraudrau, vola na yacana, nona itikotiko, na tikinisiga drau veivosaki kina, na ilavelave o solia, na tikinivolatabu drau veivosakitaka, vaka kina na veika o raica ena taleitaka. Ni o taura na ilavelave vou, vakaraica sara na tikina era na taleitaka o ira o dau solia vei ira na ivoladraudrau vovou, mo lai veivosakitaka kei ira ena gauna o sikovi ira kina. (1 Kor. 9:19-23) De dua ena qai tarai ira ena dua na gauna na ka era wilika me vakavuna mera via vulica kina e levu tale na ka.
2. Na cava e bibi kina mera vakasaqarai Jiova na tamata ena gauna oqo, eda na vukei ira vakacava?
2 Eda kila tale ga nira na sega ni mai qaravi Jiova na tamata ena nodra wilika wale tiko ga vakataki ira na ivoladraudrau. Ni rui bibi ena gauna oqo mera vakasaqarai Jiova na tamata, eda na vukei ira vakacava? (Sefa. 2:2, 3; Vkta. 14:6, 7) Ena noda wilika vei ira e dua na tikinivolatabu eda vakarautaka vinaka yani ena veigauna eda lai solia kina na nodra ivoladraudrau vou.
3. (a) Eda na vakarautaka vakacava na vica na tikinivolatabu eda na vakayagataka yadudua tiko ena noda ivakamacala? (b) Na ulutaga cava era kauaitaka vakalevu na tiko ena nomu yalava?
3 Vakamacalataka e Dua na Tikinivolatabu: Vakasamataki ira o dau kauta tiko vei ira na ilavelave vovou ni ivoladraudrau. Vakarautaka toka e so na tikinivolatabu mo vakamacala kina, qai wiliki ga e dua e ganiti koya. (Fpai. 2:4) Kena ivakaraitaki, ke mate e dua na wekana voleka, o rawa sara ga ni talevi koya vakavica mo vakamacalataka vua na ka e kaya na iVolatabu me baleta na kedra ituvaki na mate kei na inuinui ni veivakaturi. Rawa ni o vakayagataka na ivola na Reasoning ena ulutaga “Death” (Mate) kei na “Resurrection” (Veivakaturi) mo raica kina e dua na tikinivolatabu veiganiti mo vakayagataka. Ena veiganiti ena vica na nomu veisiko e tarava mo vakamacalataka kina na kena sa na vakaoti vakadua na tauvimate, qase, kei na mate. Saga mo dau vakaraica na ulutaga era kauai kina qai vakaraitaka vakamalua tiko vei ira na ka e tukuna na iVolatabu.
4. Cava e bibi kina me vakavuvulitaki na lomavuku nida vakayagataka na iVolatabu, eda na cakava vakacava?
4 Vakavulici Ira Mera Lomavuku: Dina ni vinaka me dau rawarawa qai leleka na veivosaki, ia e sega ni vinakati ga me digitaki qai wiliki na tikinivolatabu. E sa vakamatabokotaki ira tu o Setani na tamata mera kua ni kila na itukutuku vinaka. (2 Kor. 4:3, 4) O ira mada ga na sa kila tu na iVolatabu ena vinakati mera tuberi mera kila sara vakavinaka. (Caka. 8:30, 31) Koya gona, dau vakamacalataka qai vakamatatataka na ka era tu ena ivola, me vaka ga o dau cakava ni o vakaitavi ena Koronivuli ni Vuli Vunau. (Caka. 17:3) Vakadeitaka me raica o koya o vakamacala tiko vua na yaga ni Vosa ni Kalou ena nona bula.
5. Rawa vakacava ni vuli iVolatabu e dua o dau kauta tiko vua na ilavelave vovou kece ni ivoladraudrau?
5 Ke taleitaka o koya na veika sa vulica tiko, qai vakayagataka e rua se tolu na tikinivolatabu ena veigauna o sikovi koya kina. Saga mo vakayagataka na brochure na Loma ni Kalou se na ivola na Kila. Ni o cakava oqo, sa na idewadewa sara tiko ga ni nona vuli iVolatabu o koya o dau kauta tiko vua na ilavelave vovou kece ni ivoladraudrau.