Meda Maqosa Tiko ga ena Cakacaka Vakaitalatala—Me Dua Nomu Sala Dei ni Soli Mekesini

Vuna e Bibi Kina: Levu era dau taleitaka na wilika noda mekesini era sega ni via vulica na iVolatabu kei keda. De dua era lomavakacegu ena nodra lotu, se ra nanuma ni sega nodra gauna mera vuli iVolatabu. Ia nira wilika wasoma na noda mekesini, era na tekivu taleitaka na vosa ni Kalou. (1 Pita 2:2) Ena rairai tara na lomana e dua na ulutaga, se veisau na kena ituvaki. Ena matau o koya vei keda nida dau veisiko ga vakalekaleka, eda na rawa kina ni kila na ka era taleitaka se leqataka. Toso na gauna, era na rairai vulica na iVolatabu.

Kena iWalewale:

Tuvanaka e veivula mo kauta vua na ilavelave vou ni Vale ni Vakatawa kei na Yadra! O rawa ni sikovi koya ena dua tale na gauna ena loma ni vula mo uqeti koya ena dua na ulutaga ena mekesini o solia, se mo solia na ivola ena soli tiko ena vula oya. Mo vakavola na ka o cakava.—Raica na Noda Cakacaka Vakaitalatala ni Janueri 2014, t. 3.
Vakavakarau ena veisiko kece. Mo kua ni lai solia ga na mekesini, saga mo veivosaki kei itaukeinivale, mo drau veikilai me rawa ni tataleitaki tiko ga kina.
Raica na ituvaki e rawa ni tekivutaki kina na vuli. Ke dua o dau soli mekesini vua e tarogi iko se cava na rai ni iVolatabu me baleta e dua na ulutaga, solia vua e dua na ivola ni vuli e tiko kina na taro kei na isau ni ulutaga qori. Ni bera ni o biubiu, taroga e dua na taro me veivosakitaki ena veisiko tarava. Ke yavutaki nomudrau veivosakitaka ena iVolatabu se dua na ivola ni vuli, e caka vakawasoma, o sa caka vuli iVolatabu tiko. O sa bau solia vua na brochure iTukutuku Vinaka qai vakaraitaka vua na kena vulici vakalekaleka? O sa vakaraitaka vua na vidio Vuna mo Vulica Kina na iVolatabu kei na Cava e Dau Caka ena Vuli iVolatabu? Ke sega ni via vuli iVolatabu ena veigauna sa oti, de dua sa veisau na ituvaki. Vakacava mo sureti koya tale?

Tovolea ena Vula Qo:

Mo vola na yacadra o ira na wili ena nomu sala dei ni soli mekesini. Solia vei ira na ilavelave vou ni mekesini ena vula oya, oti mo tukuna vei ira ni o na kauta yani na ilavelave tarava.