Sala Dei ni Soli Mekesini—Yaga ena Tauyavu ni Vuli iVolatabu
1. Na cava e sa dau uqeti keda makawa tu mai kina na isoqosoqo i Jiova me tiko na noda sala dei ni soli mekesini?
1 E levu e sega ni dau lomadra mera vulica na iVolatabu, ia era dau taleitaka mera wilika na noda mekesini. Oya na vuna sa dau uqeti keda makawa tu mai kina na isoqosoqo i Jiova me dua noda sala dei ni soli mekesini. Nira wilika vakalevu na lewenivanua na noda mekesini, era dau lai taleitaka kina na Vosa ni Kalou. (1 Pita 2:2) Ni toso na gauna, e rawa nira taleitaka e dua na ka era wilika kina, vakavuna mera via vulica sara ga na iVolatabu.
2. Eda na vakabulabulataka tiko ga vakacava na nodra tataleitaki o ira era wili tiko ena noda sala dei ni soli mekesini?
2 “Vakasuasuataka” na iTei ni ka Dina: Kua ni solia wale ga na mekesini qai biubiu totolo, mo veitalanoa kei itaukeinivale, saga mo drau veikilai vinaka. O na kila kina na kena ituvaki, na ka e taleitaka kei na nona vakabauta, o na rawa kina ni vosa ena yalomatua. (Vkai. 16:23) Mo vakavakarau ena gauna kece ni veisiko. Ke rawa, vakamacalataka vakalekaleka e dua na tikina kei na dua na tikinivolatabu mai na mekesini mo vakasuasuataka kina na itei ni ka dina e lomana. (1 Kor. 3:6) Vola na tikinisiga kece o lesuvi koya kina, na ivola e soli vua, na ulutaga kei na tikinivolatabu drau veivosakitaka.
3. Me vakacava na wasoma ni noda lesuvi ira era wili tiko ena noda sala dei ni soli mekesini?
3 Mo Lesuvi Koya Vakavica? Mo kauta ga vakadua ena dua na vula na mekesini vovou vei ira era wili tiko ena nomu sala dei ni soli mekesini. O rawa ni lesuvi ira wasoma, ia me vakatau qori ena kemu ituvaki kei na nodra tataleitaki. Kena ivakaraitaki, ni oti e dua se rua na macawa na kena soli na mekesini, o rawa ni lesuvi koya qai kaya, “Au gole ga mai meu vakamacalataka vakalekaleka e dua na tikina ena mekesini au a solia vei kemuni.” Qori ena uqeti koya sara ga me wilika e dua na ulutaga. Ke sa wilika oti, o rawa ni taroga nona nanuma ena ulutaga ya, qai veivosakitaka vakalekaleka. Ke taleitaka nona wilika na noda mekesini, o rawa ni lesuvi koya qai solia vua na tikidua, brochure se ivola e soli tiko ena vula ya..
4. Na cava meda cakava meda vakadeitaka kina ni sa via vulica na iVolatabu o koya e wili tiko ena noda sala dei ni soli mekesini?
4 Kua ni waraki itaukeinivale me kerea me vuli iVolatabu. Mo vakaliuliu sara ga. Ke bese ni vulica na iVolatabu ena gauna sa oti, e rawa ni o vakaraitaka vua ena so na gauna na ulutaga ni Vale ni Vakatawa na “Saumi na Taro Vakaivolatabu” qai taroga ke vinakata me veitalanoataka. De dua e rawa sara ga ni tekivutaki kina na vuli iVolatabu. Ia ke sega ni tauyavutaki rawa na vuli, mo solia tiko ga vua na mekesini me rawa ni vakabulabulataki na nona tataleitaki.