Porokaramu Vou ni Soqo ni Tabacakacaka

Ena iotioti ni veisiga ni vuravura ca oqo, e bibi dina vei keda na lotu Vakarisito meda qarauna na noda tokara na isulu vakayalo, da qai taqomaka na keda irogorogo. (Vkta. 16:15) E veiganiti kina na usutu ni porokaramu ni soqo ni tabacakacaka ena yabaki vakacakacaka ni 2006 “Dou Vakaisulu ena Tamata Vou.”​​—⁠Kolo. 3:​10, VV.

iMatai ni Siga: Na imatai ni vosa veitaravi, “Me Laurai ena Nomu Bula na iTovo Vou,” ena vakabibitaki kina ni noda bucina na itovo vou ena yaga ena basoga ni noda bula kece. Eda na bucina vakacava na itovo vou? Ena veivosakitaki oqori ena iotioti ni rua na vunau ena imatai ni siga, “Vakavulici Iko Mo Dau Vakananuma na Veika Vakayalo” kei “Na Vuli ena Vakarawarawataka Noda Bulataka na iTovo Vou.”

iKarua ni Siga: Ena veivosakitaki ena ikarua ni vosa veitaravi, “Vakavulici na Yamedra na Vuku” na sala e veiuqeti kina na itovo vou me baleta na vakayagataki ni yame. “O sa Vakamalumalumutaki Koya Tiko na Vunica?” e usutu ni vunau soqovi levu, ena veivosakitaki kina na bibi ni noda yadrava tiko na ilawaki i Setani. Na iotioti ni rua na vunau ni soqo, “Me Kua ni Tauvi Iko na Duka kei Vuravura” kei na “Vakavouya Tiko e Veisiga na Tamata e Loma,” ena uqeti keda meda kauta laivi na itovo kei na ivalavala e veisaqasaqa kei na ivalavala dodonu ni Kalou, da qai dei tiko ga ena noda qaravi Jiova.

Eda vakanamata dina meda na vakaukauataki ena noda vakaisulu tiko ga ena itovo vou!