Vakaraitaka ni O Kauai Dina ena Nomu Kauaitaka na Ka O Raica

¹ Erau ivakaraitaki uasivi na Kalou o Jiova kei Karisito Jisu ena nodrau kila vinaka na ka sara ga era gadreva tu na tamata, kei na nodrau dau vukei ira. (2 Vei. 16:9; Mari. 6:​34) Nida kila rawa na ka era taleitaka ra qai kauaitaka o ira eda sotava ena cakacaka vakavunau, e rawa nida moica na itukutuku vinaka eda vunautaka me ganiti ira.

² Raica na Veika Lalai: E dau kauaitaka o Jisu na ka e raica. (Mari. 12:​41-​43; Luke 19:​1-6) Nida volekata yani na katuba ni dua na vale da qai raica na ivakatakarakara ni lotu, na iyaloyalo se vosa e kabi tu ena motoka, se na iyaya ni vakatatalo e lomanibai, meda vakayagataka sara na veika oqori meda maqosataka kina noda vunautaka na itukutuku vinaka.

³ Na irairai ni matadra kei na nodra imoimoi e rawa sara ga nida kila kina na ka e tu e lomadra. (Vkai. 15:13) De dua na nona takali e dua na nodra dau lomani se na ituvaki leqataki era tu kina e vakavuna mera gadreva na veivakacegui. Era na marau kevaka eda wasea vei ira e so na tikinivolatabu e ganiti ira sara ga. (Vkai. 16:24) Ia vakacava kevaka e vakatotolo tiko o itaukeinivale me gole ina dua na vanua se keveta tiko e dua na gone e tagi tiko? Ena vinaka meda qai lesuvi koya ena dua tale na siga. Na noda veinanumi kei na noda ‘veilomani’ vaka oqori ena uqeti ira mera vakarorogo ena gauna eda lesuvi ira kina.​​—⁠1 Pita 3:⁠8.

⁴ Moica Nomu iVakamacala: A kauaitaka na yapositolo o Paula na icabocabonisoro e yalataki ina “Kalou e Tawa Kilai” ena koro o Aceni. E vakayagataka oqo me moica kina na ivakarau ni nona vunautaka na itukutuku vinaka, ni kaya: “Na Kalou ko ni dau qarava tiko oqo ka sega ni kila, sa i koya na Kalou au sa mai tukuna tiko oqo vei kemuni.” Nona vosa vakayalovinaka o Paula e uqeta e so vei ira na tu e kea mera rogoca na itukutuku ni Matanitu ni Kalou ra qai vakabauta tale ga.​​—⁠Caka. 17:​23, 34, VV.

⁵ Na noda dau kauaitaka na ka, eda na rawa ni kila kina na ka era dau galeleta na tamata, da qai moica na noda ivakamacala me ganiti ira. Meda vakayagataka tale ga na taro me rawa kina nira talaucaka na lomadra na itaukeinivale. Vakasamataka na tikinivolatabu mo wilika me rawa kina ni tataleitaki. (Vkai. 20:⁠5) Noda dau kauaitaka na ka eda raica kei na noda kauaitaki ira dina na tamata eda na rawa ni maqosa kina ni wasea na itukutuku vinaka.