Na Vuli e Vukei Keda Meda Vakayagataka na Ka Eda Vulica
1 Nida dikeva na iTuvatuva ni Koronivuli ni Vuli Vunau ni 2006, eda saga me yaga vei keda na ka eda vulica mai na iVolatabu nida bulataka ena noda veiqaravi e veisiga. E dodonu me vukei keda meda vakayagataka na ka eda vulica.—Joni 13:17; Fpai. 4:9.
2 Nida Vakamacala: Na ituvatuva ena yabaki oqo e kurivi tale kina e dua na miniti mera vakamacala kina na vakarorogo ena veitikina bibi mai na wili iVolatabu. Me qarauna na tacida e lesi ena itavi oqo me vakamacala ga ena lima na miniti, sega ni ono na miniti. Mera qarauna tale ga na vakarorogo na gauna era vakamacala kina. Nira vakasamataka vinaka na nodra ivakamacala, e rawa nira vakamacalataka e dua na tikina yaga ena loma ga ni 30 na sekodi ke dede. Rawa ni le tini era vakamacala ena lima na miniti e lesi mera vakamacala kina na vakarorogo.
3 Vosa e Veivakavulici: Na veitikina bibi mai na wili iVolatabu kei na Vosa NB.1 me vakamacalataki kina na ka e rawa ni yaga ena noda cakacaka vakavunau kei na veika e vauca na noda bula e veisiga. O koya e vosa me kua ni uqeti ira ga na vakarorogo ena ka mera cakava. Me vakamatatataka sara ga na ka me caka, vakaraitaka na sala ena rawati kina, qai tukuna na yaga ni kena muri na ivakasala oqori. E rawa ni kaya na tacida e vakaitavi kina, “Oqo na ka e vakasalataki keda kina na tikinivolatabu oqo,” se “Oqo na sala eda rawa ni vakayagataka kina na tikinivolatabu oqo ena cakacaka vakavunau.” Era kila vinaka na qase kei ira na dauveiqaravi ni ivavakoso na veika e ganita na ivavakoso, e dodonu gona mera vakamacalataka ga na ka e veiganiti.
4 E dau yaga vakalevu na kena vakayagataki na ivakaraitaki e so ena iVolatabu. Ni tukuna oti na tacida e dua na ivakaraitaki ena iVolatabu, e rawa ni kaya, “E rawa tale ga nida sotava na ka vata oqo.” Na ivakaraitaki vakaivolatabu era vakayagataka na tacida me salasalavata sara ga kei na veitikina e yavolita na tikinivolatabu, na iVolatabu taucoko, vaka kina na veika e tabaka na “dauveiqaravi yalo dina ka vuku.”—Maciu 24:45, VV.
5 Na vuku e okati kina na noda vakayagataka na noda vakasama meda kila vinaka kina e dua na ka. “Sa ka levu duaduaga na vuku.” (Vkai. 4:7) Nida rawata na vuku ena noda vuli ena Koronivuli ni Vuli Vunau, meda vulica tale ga na iwalewale ni noda wasea na vuku oqori vei ira e so tale.