Vakayagataka Vakavinaka Sara na Noda iVola

1. Eda na vakatotomuri Jisu vakacava ena noda vakavinavinakataka na ka e vakarautaka o Jiova?

¹ Ni sa vakania vakacakamana e dua na ilala levu o Jisu, a tuvanaka na kena maroroi na vo ni kakana. (Maciu 14:​19-​21) Na nona raica o Jisu me kua ni vakasabusabutaki na isolisoli i Jiova e ivakaraitaki vinaka vei keda meda dau “vakavinavinaka” nida vakayagataka vakavinaka sara na ka e vakarautaka mai o Jiova ni vakayagataka “na dauniyau yalo dina ka vuku.”​​—⁠Kolo. 3:​15; Luke 12:​42, VV; Maciu 24:​45-​47, VV.

2. Na cava me caka me kua kina ni mai bini tu na mekesini?

² Mekesini: E rawa ni mai bini tu na mekesini. Ke dau mai vo tu na noda mekesini, ena vinaka meda vakalailaitaka na levu ni mekesini eda dau kerea. Vakacava na mekesini makawa? E sega ni makawa rawa na lewe ni mekesini ena toso ni gauna. Ke sa mai bini tu na mekesini makawa, de na tiko e so na iwalewale yaga e nanuma na ivakatawa ni cakacaka se dua tale na qase mera veisoliyaki kina.

3, 4. Na cava me nanumi tiko nida taura na noda ivola ena Kingdom Hall?

³ So Take na iVola: Ni veisau na ivola me soli, raica mada eliu ke sa tiko mai vale na ivola mo solia ena cakacaka vakavunau ni bera ni o lai taura tale mai eso ena Kingdom Hall. Me sa macala rawa tu na levu ni ivola mo na solia ena dua na macawa, oti qai taura tale mai eso ni o sa solia kece.

⁴ Na ivola o vinakata me nomu, taura ga na ka o gadreva dina. Vola kina na yacamu. Ke mani yali, ena sega ni dredre me vakasukai yani. Ke o vakayagataka na Watchtower Library ena CD-ROM o qai maroroya tu na nomu ilavelave ni mekesini, de dua ena sega ni vinakati mo kerea tale na bound volume ni Watchtower kei na Awake!

5. Na cava meda nanuma tiko nida solia na noda ivola?

⁵ Soli ni iVola: Eda na saga meda na solia ga na noda ivola vei ira na taleitaka dina. Nanuma tiko ni o keda sara ga e noda itavi na kena vakailavotaki na iyaya yaga qo ena noda cakacaka vakavunau. Ni o solia e dua na ivola vei ira na tataleitaki, kua ni tu suka mo vakamacalataka ni rawa tale ga nira cau ena kena tokoni na kacivaki ni itukutuku vinaka ni Matanitu ni Kalou e vuravura raraba.

6. Na cava meda raica kina vakabibi na noda ivola, na cava ena uqeti keda kina qo meda cakava?

⁶ A veivakani vakacakamana o Jisu ena kakana vakayago, ia e vakavuqa ga nona dau veivakani vakayalo. E kaya o Jisu: “E na sega ni bula na tamata e na madrai duadua ga; ia sa bula ga e na vosa kece ga sa lako mai na gusu ni Kalou.” (Maciu 4:​4, VV) Na noda ivola e sereka na dina ni Vosa ni Kalou e rawati kina na bula tawamudu. (Joni 17:⁠3) Meda kua sara ni vakasabusabutaka!