Me Dei Noda iTuvatuva—Eda na Tauca na Kena Yaga
1. Na cava e bibi kina meda dau dikeva tale na noda ituvatuva vakayalo?
1 Nida se qai lotu Vakarisito vou, e kena ivakarau me dua na noda ituvatuva vakayalo, da qai lomakatakata ni muria. E okati ena ituvatuva oqo na noda dau vulica vakataki keda na iVolatabu, tiko ena soqoni, cakacaka vakavunau, kei na masu. Ena nona vakalougatataka o Jiova na noda sasaga, eda a toso kina vakayalo. Ia sa na rairai oti oqo e vica na yabaki mai na gauna eda papitaiso kina. E vakacava, eda se lomakatakata tiko ga ni muria na noda ituvatuva vakayalo?
2. E yaga vakacava vei keda na noda wilika na iVolatabu e veisiga?
2 Dikeva Tale Nomu iTuvatuva: E dau nomu ivakarau beka mo wilika na Vosa ni Kalou e veisiga? Eda na tauca na kena yaga nida cakava vaka kina! (Josua 1:8; Same 1:2, 3) O ira kece na tui e Isireli makawa e dodonu mera wilika na nodra ilavelave ni Lawa ‘ena veisiga era bula kina.’ Na cava na kena yaga vei ira? Ena vukei ira na tui mera yalomalumalumu ra qai rerevaki Jiova, mera kua ni gole tani kina mai na nona ivakaro. (Vkru. 17:18-20) E vaka tale ga kina nikua, noda wilika e veisiga na iVolatabu e vukei keda me vinaka noda ivalavala, meda kua ni beitaki ena veika ca ni vuravura torosobu oqo. Eda na vakarautaki keda tale ga kina vakavinaka ena cakacaka vakavunau.—Fpai. 2:15; 2 Tim. 3:17.
3. Na veivakalougatataki cava eda na vakila nida tiko wasoma ena soqoni?
3 E dau nona ivakarau o Jisu me lako ina nodra valenilotu na Jiu, na vanua e dau veivosakitaki kina na iVolatabu. (Luke 4:16) Sega ni vakabekataki ni ka oqo e vakaukauataki koya me vosota na veika dredre ena vakarau sotava. Eda dau vakaukauataki tale ga ena veika vakayalo e talaucaki mai ena soqoni, vaka kina na noda dau veivakayaloqaqataki vakamataveitacini. (Roma 1:12) Na noda dau sosoqoni vata vaka oqo ena vukei keda meda vosota na veika dredre eda sotava tiko ena iotioti ni veisiga oqo. (Iper. 10:24, 25) E vakacava, e se noda ituvatuva dei tiko ga na lako ena soqoni kece?
4. Ena yaga vakacava vei keda noda cakacaka vakavunau e veimacawa?
4 E tukuni ena iVolatabu na nodratou dau vakaitavitaki iratou na yapositolo ena kacivaki ni itukutuku vinaka “e na veisiga kecega e na vale ni soro, kei na veivale kecega.” (Caka. 5:42) De dua e sega ni rawa vei keda meda vunau e veisiga, ia e rawa beka nida vakaitavi ena dua na basoga ni cakacaka vakaitalatala e veimacawa? Nida cakava oqo ena maqosa tiko ga na noda vakayagataka na Vosa ni Kalou, eda na marautaka tale ga na veika vivinaka eda sotava nida wasea na ka dina ena iVolatabu.
5. Na cava e bibi kina meda masu wasoma vei Jiova?
5 A vakalougatataki na parofita o Taniela ena ivakarau ni nona qaravi Jiova. E sega ni vakadraki na nona veiqaravi, e duadua tu ga ena nona bula taucoko. Oqo e okati kina na nona masu wasoma vei Jiova. (Tani. 6:10, 16, 20) Nida masu wasoma tale ga vei Jiova mai vu ni lomada, eda na vakila na nona tokoni keda ena yalona tabu. (Luke 11:9-13) Sega ni o koya ga oya. Eda na vakila tale ga ni sa toro voleka mai vei keda o Jiova, meda veivolekati sara kei koya. (Same 25:14; Jeme. 4:8) Sa dua dina na ka totoka! Meda saga mada ga meda dei ena noda ituvatuva vinaka vakayalo, eda na tauca kina na kena yaga.