Meda Vakaitavi Kece ena Veisoliyaki ni Awake! Lavotaki ni Vula o Sepiteba
1 E levu era dau taleitaka na nodra sere na manumanu vuka kei na totoka ni dromu ni matanisiga. Ia e levu vei ira era sega sara ga ni vakabauta ni bulia na veika kece oqo na Tamada vakalomalagi. E noda itavi bibi gona meda vakalagilagi Jiova na Dauveibuli ena noda tukuni koya yani. E gauna vinaka meda cakava kina oqo ena vula mai oqo, nida na veisoliyaka kina na itabataba vakavalagi ni Awake! ni vula o Sepiteba. (Aisea 40:28; 43:10) E vakarautaki vakatabakidua na itabataba ni Awake! oqo me baleta na ibulibuli i Jiova, e kena ulutaga “Is There a Creator?” (E Tiko Beka e Dua na Dauveibuli?)
2 Ena Yalava: Ena vinaka sara meda tokona na ituvatuva ni cakacaka vakavunau vakaivavakoso ena veisiga Vakarauwai kece meda veisoliyaka kina na itabataba ni Awake! oqo vei ira era wilika na vosa vakavalagi. E rawa nida solia tale ga na ivoladraudrau oqo ena lomanimacawa. Na itabataba oqo era na rairai taleitaka na qasenivuli kei ira tale e so era cakacaka ena tabana ni vuli. Me vakarautaki gona e dua na ituvatuva mera sikovi kina o ira oqori era tu ena yalava.
3 Kevaka e so era tataleitaki, meda taroga e dua na taro me qai saumi ena veisiko e tarava. Kena ivakaraitaki, rawa nida taroga se cava e vakatara tu kina na rarawa na Dauveibuli kevaka e Kalou dau loloma. Ena veisiko e tarava, vakaraitaka sara na wase 1 se wase 11 ni ivola Kaya na iVolatabu. Se rawa nida taroga e dua na taro me baleta na inaki a buli vuravura kina na Kalou, da qai vakaraitaka na wase 3 ena veisiko e tarava.
4 E Koronivuli: Ke o se vuli, vakacava mo solia vakailoloma vua nomu qasenivuli se vei ira na nomu icaba e koronivuli na Awake! oqo. Kevaka mada ga o biuta e dua na ilavelave ena dela ni nomu desi, e rawa nira kauai kina e so, era na taroga sara beka e so na ka me baleta na nomu vakabauta. Rawa ni o vakayagataka tale ga na veika era volai tu kina ni veivosakitaki ena loma ni kalasi na bula vakaidewadewa kei na ulutaga tale e so vaka oya. Rawa ni o vakayagataka tale ga ena gauna veiganiti cava tale. Sega ni vakabekataki ni na yaga vei iko na nodra taro na itabagone ena itabataba ni Awake! oqo, e kena ulutaga “How Can I Defend My Belief in Creation?”
5 E ganiti Jiova dina me dokai qai vakalagilagi ena vuku ni veika e bulia. (Vkta. 4:11) Na noda gumatua ni veisoliyaka na Awake! oqo e dua na sala eda vakaraitaka kina noda dokai koya. Na sala tale ga oqo eda sa vukei ira tiko kina na wekada mera dokai Jiova.