Nida Kaukaua Vakayalo Eda na Guta na Cakacaka Vakavunau

¹ A tukuna vei ira nona tisaipeli o Jisu: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:34) Na cava e dau guta kina o Jisu na cakacaka vakavunau? Baleta ni qaqaco vinaka tu na nona bula vakayalo qai vinakata dina me kilai Tamana vinaka, me vakamarautaki koya tale ga. Eda kila qo mai na ka e kaya: “Keirau sa dua bauga kei Tamaqu.” (Joni 10:30) Ia e rawa vakacava meda guta tale ga na cakacaka vakavunau?

² Noda Vakani Keda Vakayalo e Veisiga: Eda na marau beka ke da sega ni kana ena dua na siga? E va sara ga qo noda kania na kakana vakayalo, e bibi meda kua ni calata ena dua na siga. Eda na cakava rawa vakacava qo vakavuvale se yadudua? Kena imatai, e bibi meda wilika e veisiga na Vosa ni Kalou. E kaya e dua na tacida sa wilika va50 na iVolatabu: “au vakabauta ni dodonu meu wilika na iVolatabu me rawa ni qaqaco kina noqu veiwekani kei koya na Dauveibuli. E yaga vei au noqu dau vakananuma na Vosa ni Kalou meu kila kina na yalododonu i Jiova kei na nona itovo qoroi tale e so. Sa ivurevure dina ni veivakaukauataki vei keda.”

³ Na ikarua ni ivukevuke noda dikeva na tikinivolatabu ni veisiga. E kaya na ivakamacala taumada ni Dikeva na iVolatabu e Veisiga 2007: “E vakatututaki meda tikica na gauna e veisiga meda wilika da qai vakananuma na vakasama e koto kina. E vinaka meda cakava qo ni se bera ni tekivu na noda cakacaka ni dua na siga. Yaga sara ke da veivosakitaka vakavuvale, ni kena ibalebale ya nida sa veitokoni tiko ena tubu vakayalo ni lewenivuvale yadua. Macala ni na toroya cake tale ga na ivakatagedegede ni bula ena lomanivuvale.” Noda dikeva na tikinivolatabu ni veisiga e salavata sara ga kei na ikatolu ni ka ena rawa ni yaga vei keda, ya na noda vuli vakataki keda kei na vuli vakavuvale. Vakacava o keda yadudua, eda dau vakavakarau ena soqoni? Eda dau vuli vakavuvale dina ga ni sega na luveda? E dau vakasalataki keda na dauveiqaravi yalodina ka vuku meda cakava na veika qo. Nida muria vinaka na ivakasala qo ena uqeti keda meda kauaitaka noda veika vakayalo, eda na vakaliuca tiko ga kina na veika bibi ena noda bula.​—⁠Kolo. 3:⁠2.

⁴ Noda Masu Wasoma: E dau saga vakaukaua o Jisu me tikica na gauna me masu vei Tamana. (Mari. 1:35) Ena yaga tale ga vei keda qo ena noda masu mai vu ni lomada vua na Tamada ena veisiga. E uqeti keda o Jisu meda “dau masu wasoma.” (Maciu 26:41) Nida masu meda kua wale ga ni kerekere tiko, meda vakavinavinakataka tale ga vei Jiova na veika kece e cakava ena vukuda. (Fpai. 4:⁠6) Noda cakava qo e vakaraitaka nida sa vakacaucautaki Jiova tiko ena marau.

⁵ A vakamatatataka o Jisu vei ira na nona yapositolo na vu ni nona gumatua ni qaravi Jiova, e kaya kina: “ni’u sa lomani Tamaqu.” (Joni 14:31) Ena titobu noda lomani Jiova nida wilika na iVolatabu e veisiga, dikeva na tikinivolatabu, vuli vakavuvale, da qai masu. Ena uqeti keda tale ga meda guta na vakalagilagia na yacana.​—⁠Caka. 4:20.