Porokaramu Vou ni Siga ni Soqo Lavotaki

Ni uqeti ira na yalo tabu, era dau gugumatua na lotu Vakarisito taumada ena nodra vunautaka na itukutuku vinaka ena veivanua. (Caka. 1:8; Kolo. 1:​23) Na porokaramu ni siga ni soqo lavotaki ni yabaki vakacakacaka ni 2007 e kena usutu, “Ogataka Vakalevu na Vosa,” ena vukei keda meda vakatotomuria na nodra ivakaraitaki vinaka na lotu Vakarisito taumada.​​—⁠Caka. 18:​5, NW.

A tukuna o Tui Tevita me baleta na Vosa ni Kalou: “Sa dina nai tukutuku i Jiova, ka sa vakavukui ira era sa sega ni vuku.” (Same 19:⁠7) Na porokaramu vakarautaki vinaka oqo ena veivosakitaki kina na yaga ni iVolatabu ‘me veivakadodonutaki,’ ena uqeti keda tale ga meda solia noda vinaka kece ena noda vakayagataka na Vosa ni Kalou nida vunau kei na veivakavulici. (2 Tim. 3:​16, 17) Na porokaramu vou ni soqo lavotaki ena vakaraitaka vei keda na sala meda kua ni tacori kina, kei na yaga ni noda bulataka e veisiga na ivakavuvuli vakaivolatabu. E vakaraitaka tale ga na sala meda vakayagataka kina na Vosa ni Kalou meda vukei ira na itabagone kei ira na ka vou mera toso vakayalo.

Meda nakita dei meda tiko ena itekivu ni porokaramu, da qai vakarorogo vinaka. Meda vakavola na ka eda nanuma ni rawa nida vakayagataka. Meda vakarogoca vinaka na ivakasala kei na veivakadreti e cauraki mai, da qai vakasamataka na sala eda rawa ni bulataka kina.

Na porokaramu ni siga ni soqo lavotaki oqo ena vakatubura noda taleitaka na Vosa i Jiova, ena vakadreti keda meda vunautaka tiko ga ena yalogu na itukutuku vinaka, ena vakaraitaka tale ga na sala meda vukei ira kina e so mera cakava na cakacaka bibi oqo. Meda vakadeitaka mada ga nida na sega ni calata na veidusimaki kei na ivakasala vakayalo e vakarautaka mai o Jiova ena soqo lavotaki oqo!​​—⁠Aisea 30:20b, 21.