Vakatotomuria na Qasenivuli Levu ni O Vakayagataka na iVola Kaya na iVolatabu
1. E vakacava na ivakarau ni nona veivakavulici o Jisu?
1 Na Qasenivuli Levu o Jisu e dau matata vinaka nona vakamacalataka na ka dina, e rawarawa tale ga nodra taura na vakarorogo. E dau taroga na taro mera vakasama kina na vakarorogo. (Maciu 17:24-27) E yavutaka nona ivakamacala ena Vosa ni Kalou. (Maciu 26:31; Mari. 7:6) E dau qarauna me kua ni levu na ka e tukuna vei iratou nona tisaipeli, ni kila ni toso na gauna ena toso tale ga nodratou kila. (Joni 16:12) E kauaitaka tale ga o Jisu na ka e vakavulica vei iratou me ratou taura rawa qai vakabauta. (Maciu 13:51) E vakarautaki gona na ivola na Kaya na iVolatabu meda vakatotomuria na ivakarau ni nona veivakavulici o Jisu.
2. Eda na vakayagataka vakacava na taro era toka ena ruku ni veiulutaga?
2 Taro ena Ruku ni Ulutaga: Ni bera nida veivosakitaka e dua na ulutaga, e vinaka meda raica rawa na taro era koto ena ruku ni ulutaga. Taroga na taro me rawa ni nanamaki o gonevuli ena kena veivosakitaki na ulutaga ena vulici. E rawa sara ga nida kerei gonevuli me sauma ga vakalekaleka na taro. Sega ni gadrevi me veivosakitaki tale na ka e tukuna o gonevuli se meda vakadodonutaki koya ke cala nona isaunitaro. Vakavinavinakataka nona sauma, tekivu sara na vuli. Nona sauma na taro ena ruku ni ulutaga eda na siqema kina se tikina cava ena ulutaga meda na vakabibitaka vei gonevuli.
3. Ena rawarawa vakacava noda caka vuli ena ivola Kaya na iVolatabu?
3 Tikinivolatabu: Me yavutaki ga ena iVolatabu na vuli. (Iper. 4:12) E sega ni gadrevi me wiliki kece na tikinivolatabu e sega ni lavetaki. Meda vakabibitaka ga na tikinivolatabu e vakamacalataka na yavu ni noda vakabauta. Me kua ni wiliki na tikinivolatabu e ikuri ga ni ivakamacala. E rawarawa na sala e tasereki kina na ka dina ena ivola Kaya na iVolatabu. Me rawarawa tale ga noda caka vuli ena ivola oqo. Meda vakabibitaka ga na tikina e dodonu me vakabibitaki, meda kua ni vakamacalataka sara vakamatailalai se da kauta tale mai e so na ka e sega ni tiko ena parakaravu.
4. Ena vakatau ena cava na noda veivosakitaka na ulutaga e tiko ena ikuri?
4 iKuri: E 14 tale na ulutaga e tiko ena ikuri. Ia e vakatau na noda via veivosakitaka na ulutaga oqori nida caka vuli. Kevaka e sa taura rawa tiko o gonevuli na wase e veivosakitaki tiko, e ciqoma tale ga ni dodonu vinaka, e rawa nida tukuna vei ira mera wilika ga vakataki ira na ulutaga ena ikuri. Kena ivakaraitaki, kevaka e sa vakabauta tu o gonevuli ni o Jisu ga na Mesaia ena wase 4, ena ulutaga “O cei o Jisu Karisito?,” e sega ni gadrevi meda veivosakitaka tale na ulutaga “Jisu Karisito—Na Mesaia Yalataki” e tiko ena ikuri. Ia ena so na ituvaki, ena vinaka me veivosakitaki na ikuri, e rawa ni caka sara mada ga vakalalai.
5. Kevaka eda veivosakitaka e dua na ulutaga ena ikuri, eda na cakava vakacava?
5 Kevaka eda vinakata meda veivosakitaka vata kei ira na gonevuli na ikuri, meda vakarautaka rawa na kena taro, da qai veivosakitaka vaka parakaravu me vaka ga e dau caka ena vuli. Ia ke da raica ni ganita meda veivosakitaka kei koya e so na tikina ena ikuri, e rawa nida cakava vakalalai oqori ena gauna ni vuli. Eda na vakadeitaka kina se sa matata tiko vua na ka e sa wilika oti mai ena nona gauna galala.
6. Rawa ni vakayagataki vakacava na kato ni railesuvi e tiko ena icavacava ni dua na wase?
6 Kato ni Railesuvi: Na taro e tiko ena ruku ni ulutaga yadua, e tiko na kena isau ena kato ni railesuvi. Rawa nida vakayagataka oqo meda railesuva kina na tikina bibi ena dua na wase. E so na dautukutuku era dau wilika sara ga na tikina e koto ena kato ni railesuvi kei na kena tikinivolatabu ena gauna ni vuli. Ra qai tarogi gonevuli se tokona vakacava na ivakamacala na tikinivolatabu e volai toka e yasana. Era na raica kina na qasenivuli se sa taura tiko o gonevuli na tikina bibi ni dua na wase kei na kena veisemati ina tikinivolatabu, e vakabauta tale ga se sega. Ra vulica tale ga kina na gonevuli mera dau vakayagataka na iVolatabu mera vakamacalataka kina na ka dina.
7. Eda na vakayagataka vakacava na ivola Kaya na iVolatabu meda vakayacora vinaka kina noda veivakavulici kei na veivakatisaipelitaki?
7 Na sala vinaka duadua meda veivakavulici da qai veivakatisaipelitaki kina oya na noda vakatotomuria na ivakarau ni veivakavulici i Jisu. (Maciu 28:19, 20, VV) Ena vukei keda kina na ivola Kaya na iVolatabu. Meda vakayagataka vinaka mada ga na ivola oqo meda vakavulica kina na ka dina ena sala e rawarawa, qai matata vei ira na vuli iVolatabu.