Meda Marautaka Noda Vulica na iVola Na Cava Sara Mada e Kaya na iVolatabu?
1 E marautaki dina noda raica ena Soqo ni Tikina “Talairawarawa Vua na Kalou” na kena soli na ivola Na Cava Sara Mada e Kaya na iVolatabu? Sa vakarau meda vakayagataka vakalevu ena cakacaka vakavunau, vakabibi ena caka vuli iVolatabu. E bibi gona meda kila vinaka na veitikina ena ivola vou oqo. E rawa nida kila vinaka baleta nida na vulica tiko ena Vulivola ni iVavakoso me tekivu ena macawa ni 17 Epereli, 2006.
2 Na ivakatawa ni Vulivola ni iVavakoso ena dusia na taro era koto ena tekivu ni veiwase yadua. Ena qai caka na vuli ni vakayagataki na taro ena ruku ni veitabana. Me wiliki qai veivosakitaki na tikinivolatabu e tokona sara ga na ka e vulici tiko. Ni sa cava na wase yadua ena yaga sara ena railesuvi na kato “Na Ka e Kaya na iVolatabu,” baleta ni tiko kina na veitikinivolatabu e sauma na taro ena itekivu ni wase yadua. O na taleitaka na saumitaro baleta ni matata, rawarawa qai vakavure vakasama na veiulutaga ena veivosakitaki ena ivola oqo.
3 Na iKuri ni ivola oqo e vakamacalataki kina vakamatailalai e so na ulutaga. Eda rawa ni vakayagataka na veiulutaga oqo ke via kila o gonevuli e so tale na ka me baleta e dua na ulutaga. Ia ena veivosakitaki ena Vulivola ni iVavakoso na ulutaga era koto ena iKuri. Me wiliki na ulutaga e tiko ena iKuri, ke balavu e rawa ni wiliki vakalalai. E sega ni tiko ena iKuri na taro ni ulutaga e vulici, o koya ga e liutaka na vuli me sureti ira na vakarorogo mera vakamacala ena nona taroga e so na taro me vakavotuya na veitikina bibi.
4 Ena totolo ga na kena vulici ena Vulivola ni iVavakoso na ivola Kaya na iVolatabu. E sega ni namaki me na totolo vaka oqo noda vulica na ivola kei ira na vuli iVolatabu, vakauasivi ni so ena rairai lailai na nodra kila vakaivolatabu, se ra sega sara ga ni kila na iVolatabu. (Caka. 26:28, 29) Ena gauna eda veivakavulici kina ena ivola oqo eda na rawa ni qai veivosakitaka vakamatailalai na kena tikinivolatabu, na ivakatautauvata kei na so tale na veitikina. Me noda isausau kece meda kua ni calata e dua na vulivola da qai vakaitavi tale ga ena saumitaro ni vulici na ivola Na Cava Sara Mada e Kaya na iVolatabu?