“O na Sauma Vakacava?”

1. Na cava e dau dredre meda nanuma ena so na gauna?

¹ O taleitaka beka na Vosa ni Kalou, ia e dau dredre mo nanuma na veika lalai e volaitukutukutaki kina se dua na malanivosa e cavuti? O vinakata beka me kila vinaka o luvemu e so na usutu bibi ni iVolatabu kei na kena ivakavuvuli? Na ulutaga “O na Sauma Vakacava?,” e dau tabaki ena Yadra! ena tabana 31 ena yaga vei ira na qase kei na gone mera kila vinaka na Vosa ni Kalou.​​—⁠Caka. 17:⁠11.

2. Rawa ni vakayagataki vakacava e so na taro era koto ena ulutaga “O na Sauma Vakacava”?

² Na cava meda cakava me yaga kina vei keda na tabana 31 ni Yadra!? Oqo na ka e vakatura na ilavelave ni Janueri-Maji 2006, tabana 4: “E so na tikina . . . ena taleitaki sara vei ira na gone; so na tikina ena vakatovolei kina na vinaka ni nodra nanuma na ka era wilika o ira na gonevuli ni iVolatabu era sa matua. Na tikina . . . ‘Yaco ena Gauna Cava?’ ena vukei iko mo kila na gauna e bula kina e dua e cavuti ena iVolatabu kei na gauna era yaco kina e so na veika lelevu. Dina ena kunei na isaunitaro era tarogi toka ena lomanibai . . . ‘Ena iLavelave Oqo’ ena loma ni ivoladraudrau, ia na isau ni veitaro tale e so ena tabaki toka . . . ena matanivola e vakatoboicu na kena volai. Vakacava mo saga taumada mo sauma na veitaro oqori ni bera ni o wilika na kena isau o qai wasea vei ira e so tale na ka o vulica? O rawa sara mada ga ni vakayagataka na tutuna vou, ‘O na Sauma Vakacava?’ mo dou veitalanoataka vakavuvale se vakailawalawa.”

3. E yaga vakacava ena so na vuvale na tabana 31 ni Yadra!? Na tikina cava o taleitaka?

³ Era sa marautaka tiko e levu na vuvale na tabana 31 me yavu ni nodra vuli vakavuvale. A vola e dua na tina me baleta na tabana 31 ni Yadra! vakavalagi: “Keirau nanuma kei watiqu me keirau okata ena neitou vuli vakavuvale na ‘Children’s Picture Search,’ me taleitaka qai vakabulabulataka na neitou vuli kei na luve i keirau yalewa e yabaki tolu. E vakamarautaki keirau ni dau taura nona ilavelave ni Yadra!, cega yadudua na tabana me yacova ni raica na iyaloyalo e vaqara tiko.” E kaya e dua na tama e Brazil: “Keirau taleitaka kei na luvequ yabaki vitu o Moises na tabana 31 ni Yadra! E vulica kina me dau vakarorogo, raica na tikinivolatabu, taura vakabibi na iyaloyalo, e vulica tale ga na gauna vakaivolatabu e yaco kina e dua na ka.” O Ashley e dua na gone yabaki walu, a vola: “Vinaka vakalevu na ulutaga ‘O na Sauma Vakacava?’ e tiko ena tabana e muri ni Yadra! Au vulica kina e levu na tikina ena iVolatabu.”

4. Era na vakayagataka vakacava na vuvale na tabana 31 ena nodra vuli vakavuvale?

⁴ Vakacava mo vakayagataka na ulutaga “O na Sauma Vakacava?” me tiki ni nomudou vuli vakavuvale? Rawa ni o vakayagataka na Index se Watchtower Library ena CD-ROM mo raica kina na isau ni so na taro e via dredre toka ni bera ni o qai veidutaitaka na kena isau ena kato ena tabana vata tiko ga e 31. Noda cakava oqo eda sa vakaraitaka tiko vei ira na gone na iwalewale ni vakekeli. Kevaka era sa itabagone na luvemu, vakacava mo lesia vei ira ni bera na vuli vakavuvale mera vaqara na isaunitaro e via dredre toka ena “O Cei o Yau?” se “Yaco ena Gauna Cava?” Mera qai wasea ena vuli na tikina era sa vakelia mai. Nodra vakayagataka vinaka na itubutubu na tabana 31 ni Yadra!, e dua na sala era sa gumatua tiko kina ni vakavulica na Vosa ni Kalou vei luvedra, era sa vukei ira tale tiko ga na lalai mera kila “nai Vola tabu” nira se gone.​​—⁠2 Tim. 3:​15; Vkru. 6:⁠7.