Na Cakacaka Lavotaki me Tekivu ena 16 Okotova me Yacova na 12 Noveba
1 “Sa Voleka na iTinitini ni Lotu Lasu!” Oqo na ulutaga ni iTukutuku ni Matanitu Naba 37 ena tekivu veisoliyaki tiko e veiyasa i vuravura ena vula mai oqo. Ena imatai ni rua na macawa ni vula o Okotova eda na veisoliyaka tiko kina Na Vale ni Vakatawa kei na Yadra! Ena qai tekivu veisoliyaki na iTukutuku ni Matanitu Naba 37 ena Moniti, 16 Okotova me yacova na Sigatabu, 12 Noveba. Ena veimuanimacawa ena loma ni gauna oqori eda na solia vata na iTukutuku ni Matanitu kei na ivoladraudrau.
2 O Cei Mera Vakaitavi Kina?: O ira kece na kacivaka tiko na itukutuku vinaka mera tokona na cakacaka oqo ena nodra solia kina nodra vinaka taucoko. E so e rawa sara ga nira painia veivuke. Ke tiko e dua na luvemu se vuli iVolatabu e sa laurai vua na toso vakayalo, vakacava mo uqeti koya me lai raici iratou na qase, de dua sa na ganiti koya me dautukutuku bera ni papitaiso. Mera liu tale ga na qase ena nodra uqeti na dautukutuku era sa mate tu vakayalo mera mai vakaitavi, e rawa nira lesi mera cakacaka vata kei ira na dautukutuku matua.
3 E sa vakau yani ena veivavakoso kece na iTukutuku ni Matanitu Naba 37, me rauta toka na ya50 na nodra ilavelave na dautukutuku kece kei ira na painia. O ira na tataleitaki era se bera ni dautukutuku mera ya5, mera na lai veisoliyaka vei ira na wekadra kei na nodra itokani. Na dautukutuku kece me vola na levu ni iTukutuku ni Matanitu e solia, qai vola oqori ena daku ni fomu ni ripote ni vula Okotova kei na Noveba. Na vunivola ni ivavakoso ena soqona na levu kece ni ilavelave e sa soli, qai vakauta ina valenivolavola ni tabana ni cava na vula o Okotova kei na Noveba. Na ilavelave e vo ena ivavakoso ni sa oti na gauna e dodonu me veisoliyaki kina, e rawa ni qai vakayagataki ena so tale na taba ni cakacaka vakavunau.
4 Na Ka Meda Kaya: Me lekaleka ga na noda ivakamacala, me vakarawarawataka na noda veisoliyaka vakalevu na iTukutuku ni Matanitu Naba 37. E rawa nida kaya: “E veisoliyaki tiko na tikidua oqo e vuravura raraba. Au vakaitavi tiko kina ena noda vanua. Oqo na nomu ilavelave e sega ni saumi. Yalovinaka mo qai wilika toka.” Ena vinaka meda kua ni kauta na noda kato ni cakacaka vakavunau, meda sa taura sara tu ga e ligada na iTukutuku ni Matanitu Naba 37. Meda kua ga ni guilecava meda vola toka na yacadra na tataleitaki.
5 Na Tarai ni Yalava: Me kua ni veisoliyaki e salatu, ia meda lai veisoliyaka ga e veivale se na yalava ni bisinisi. Meda tara vinaka kece na noda yalava. Vola na vale e lala qai lesuva ena dua tale na siga. Me tekivu ena Moniti, 6 Noveba, sa na qai vakatarai meda biuta e dua na ilavelave ena vale e lala. Ia kevaka e rui levu na yalava ni ivavakoso qai lekaleka na gauna me tarai kece kina, sa rawa me tekivu biu na tikidua ena vale lala mai na 16 Okotova. Oqo me ratou qai vakatulewa ga kina na qase ni ivavakoso.
6 Sa toso totolo mai na gauna me na vakarusai kina o ‘Papiloni na Ka Levu.’ E bibi gona mera drotani mai vua na tamata ni bera ni vakarusai. (Vkta. 14:8; 18:8) Meda nakinaki rawa meda vakaitavi kece ena cakacaka lavotaki oqo meda vakatakila yani kina nona sa voleka ni bale vakadua o lotu lasu!