Kato ni Taro

◼ O cei me kacivaka na sere ni Koronivuli ni Vuli Vunau, Soqoni ni Cakacaka, Soqoni Soqovi Levu, kei na Vuli Vale ni Vakatawa? Ena tukuna vakacava?

E volai tu ena iTuvatuva ni Koronivuli ni Vuli Vunau na sere me tekivutaki kina na koronivuli. Na ituvatuva oqo e tiko ena itoma ni Noda Cakacaka Vakaitalatala ni vula o Okotova. Ia na sere me tekivu qai tini kina na Soqoni ni Cakacaka e tiko ena tabana 2 ni Noda Cakacaka Vakaitalatala. E tiko tale ga ena tabana 2 ni Vale ni Vakatawa e vulici, na sere me tekivu qai tini kina na vuli. Na soqoni yadua e vakarautaki vata kei na kena sere, oya na vuna ni vulici Na Vale ni Vakatawa e dodonu ga me kacivaka na kena sere o koya e veitauri kina, vaka kina na Soqoni ni Cakacaka.

Kena ivakaraitaki, na ivakatawa ni Koronivuli ni Vuli Vunau ena kidavaki ira na tiko ena soqoni, ena tekivutaka na sere, ena taura tale ga na koronivuli, ia ni sa oti na koronivuli ena qai sureti koya na tacida e nona na imatai ni itavi ni Soqoni ni Cakacaka. Na tacida oqo ena kacivaka na sere ni Soqoni ni Cakacaka.

Ena tekivutaka na Soqoni Soqovi Levu na jeameni. Ena kidavaki ira na tiko ena soqoni qai sureti ira kece mera lagata vata na sere e digia o koya e vunau. Na jeameni (se dua tale na tacida tagane e sa lesi rawa tu) ena dolava na soqoni ena masu. Ena kidavaki koya na tacida ena vunau, qai tukuna na nona ulutaga. Ni sa oti na vunau, ena sega ni vakamacalataka vakalekaleka na jeameni na ka a vunautaki, ena vakavinavinakataka ga na vunau. Ena kacivaka sara na ulutaga ni vunau soqovi levu ni macawa e tarava, qai sureti ira na vakarorogo mera vakanamata ena kena vulici Na Vale ni Vakatawa. E sega ni gadrevi me kerea na jeameni me lai tukuna na tacida e vunau na iloloma ina ivavakoso e gole mai kina. Oti oya, me qai sureti ina buturara o koya e dau taura na vuli Vale ni Vakatawa.

Na tacida e dau liutaka na vulici ni Vale ni Vakatawa ena kacivaka na sere me lagati ni bera ni tekivu na vuli. Ena taura na vuli me salavata kei na idusidusi e sa tabaki oti, qai tinia ena sere. Vakalevu ga e dau sureti o koya e vunau me tinia na soqoni ena masu.

Noda muria na idusidusi oqo ena vakaduavatataka na ituvatuva e dau cicivaki kina noda soqoni.