Vakacegui Ira sa Ramusu na Yalodra
1 Sa qai gadrevi ga vakalevu ena bula ni kawatamata na veivakacegui ni vakatauvatani kei na veigauna sa oti. Nida muria na ivakaraitaki ni noda Tui, o Karisito Jisu, eda na saga meda “vakabulai ira sa ramusu na yalodra.”—Aisea 61:1.
2 Kena iWalewale: Nida veivakacegui e dodonu me veiuqeti noda ivakamacala ena cakacaka vakavunau. Meda kua ni vakabibitaka na ituvaki ca kei vuravura se na ivakavuvuli lasu, ia meda vakabibitaka ga na ka dina e tukuna na iVolatabu kei na inuinui e yalataka tu na Kalou. E sega ni kena ibalebale meda sa kua ni veivosakitaka na Amaketoni. E noda itavi meda kacivaka ruarua “na yabaki vinaka i Jiova; kei na siga sa ia kina na veisausaumi na noda Kalou,” kei na noda “vakauqeta na tamata ca me biuta na nona sala ca.” Ia, na ivakasala me baleta na Amaketoni kei na kena ravuravu me kua ni lai vakabuawataka na usutu ni itukutuku vinaka ni Matanitu ni Kalou. —Aisea 61:2; Isik. 3:18; Maciu 24:14, VV.
3 Nida Vunau: Eda dau sotava e so era yalolailai baleta nira tauvimate, mate e dua na wekadra lomani, sotava na veivakalolomataki, se leqa vakailavo. Nida imuri i Karisito, e dodonu ‘meda lomani ira’ da qai vakaraitaka na yalololoma nida sotavi ira ena cakacaka vakavunau. (Luke 7:13; Roma 12:15) Noda wilika e dua se rua na tikinivolatabu me baleta na leqa e sotavi tiko, meda “dau totolo ni vakarorogo,” ena noda solia na gauna vei itaukeinivale me talaucaka na lomana. (Jeme. 1:19, VV) Nida rogoci ira, eda na qai kila na sala meda vakacegui ira kina.
4 Nida veitalanoa tiko, rawa nida kaya ena gauna veiganiti, “Au via wasea vei kemuni e so na vosa veiuqeti mai na iVolatabu.” Meda qarauna vinaka na ka eda tukuna me kua kina ni vakacalai ira na rogoci keda. E noda inaki meda veiuqeti da qai veivakacegui nida wilika na tikinivolatabu, qo ena vaqaqacotaka na lomadra. Rawa ni o raica na Reasoning From the Scriptures tabana e 117-121 ena ruku ni ulutaga “Encouragement.” Se, solia na ivolacebaceba Na Vu ni Vakacegu vei Ira Era Yalolailai qai veivosakitaka sara.
5 Gauna Meda Veivakacegui Kina: O kila beka e dua e tiko tikivi iko, drau cakacaka vata, vuli vata, se lewenivuvale e gadreva tu na veivakacegui? Vakacava mo sikovi ira ena nodra vale mo vakacegui ira kina vakaivolatabu? Ni o kila nira vinakata mera vakacegui, vakarautaka sara e dua na ulutaga veiganiti. So era dau volavola se qiriti ira. Nida lomani ira dina na wekada ena uqeti keda meda veivakacegui ena iVolatabu.—Luke 10:25-37.
6 Io, e noda itavi meda vakacegui ira na lolosi, ira na ramusu tu na lomadra, da qai vakadeitaka na inuinui vinaka sa waraki ira tu mai liu. Qo na veivakacegui era gadreva tu e levu e veiyasa i vuravura. Nida talanoataka ena marau na veika vinaka e sa yalataka tu na Kalou, ena vakacegui ira na yalomalumalumu, ena dei tale ga nodra inuinui. Meda nanuma ni dodonu meda vakacegui ira sa ramusu na yalodra.