Siga Lavotaki ni Veisureti ena Vuli iVolatabu

¹ Tekivu ena Janueri, ena tuvanaka na ivavakoso kece e dua na muanimacawa e veivula, rairai na kena imatai meda na veisureti sara ga ena Vuli iVolatabu. Qo ena rawa ni Vakarauwai se Sigatabu, na kena ga e ganita na ivavakoso. Ke sega ni vinakata o taukeinivale me vuli iVolatabu, se rawa ga nida solia na ivola Kaya na iVolatabu se na mekesini vou. Mera saga kece na qase kei na dauveiqaravi ni ivavakoso mera vakaitavi vakalevu ena cakacaka qo qai vukei ira na dautukutuku ena tauyavutaki ni vuli iVolatabu.

² Eratou na vakadeitaka na Komiti ni Cakacaka na siga ena muanimacawa meda na veisureti kina ena vuli iVolatabu. Ena vinaka me dau vakananumi vei ira na mataveitacini na siga qori me rawa nira vakavakarau, ra veisureti tale ga ena vuli iVolatabu nira vunau e veivale se sikovi ira lesu na tataleitaki.

³ Vakavakarau: Ena itoma ni Noda Cakacaka Vakaitalatala ni Janueri 2006 kei na ivola na Reasoning tabana e 12, e tiko kina e so na vakatutu me baleta na tauyavutaki ni vuli iVolatabu. De dua e so era na via vakayagataka na ivolacebaceba me vaka O Via Kila na Ka Dina? E tiko tale ga ena tabana e 3 ni Noda Cakacaka Vakaitalatala ni Okosita 2007, na vakatutu ni kena tauyavutaki na vuli iVolatabu nida sikovi ira lesu na taura na mekesini. Ena tuvanaki mera taura na soqoni ni cakacaka vakavunau na qase kei na dauveiqaravi ni ivavakoso. Na soqoni ena rauta e 10 ina 15 na miniti, ena veivosakitaki se vakatasuasuataki ena loma ni gauna qori e dua se rua na vakatutu e yaga ena tauyavutaki ni vuli iVolatabu.

⁴ Sega ni tamata kece era na via vulica na iVolatabu se ra tomana tiko ga nodra vuli. Ia sega ni kena ibalebale qori meda sa kua ni veisureti ena vuli iVolatabu, ni o Jiova ena vakayarayarataki ira mai na tamata era vaka na sipi ina nona isoqosoqo. (Joni 6:​44) E sega wale ga ni noda itavi na kaburaki ni itei ni ka dina, ia me teivaki me vakasuasuataki tale ga na ka sa kadre, qori e oka kina na nodra vakavulici ena iVolatabu na yalomalumalumu. Noda cakava qo e vakaraitaka nida tamata cakacaka ni Kalou.​​—⁠1 Kor. 3:⁠9.