O na Vakavakarau Vakacava ina Soqoni ni Cakacaka?
1. Na cava na inaki ni Soqoni ni Cakacaka, cava meda cakava me yaga vakalevu kina vei keda?
1 Eda vakavulici ena Soqoni ni Cakacaka ena sala me vuavuaivinaka kina noda cakacaka vakaitalatala. E vakabibitaki kina na vunautaki ni itukutuku vinaka, nodra tuberi eso tale mera tisaipeli, kei na kena kacivaki ni sa voleka na siga ni lewa. (Maciu 28:20; Mari. 13:10; 2 Pita 3:7) Na soqoni bibi qo ena yaga vakalevu ke da vakavakarau vinaka, da qai tu vakarau ni vakaitavi kina.
2. Eda na vakavakarau vakacava meda lai vakarorogo?
2 Vosa: Na vanua e yavutaki kina e dua na vosa e dau volai toka ena ivakamacala vei koya e vakaitavi. Railesuva na ulutaga kei na tikinivolatabu era lavetaki, vakasamataka tale ga na sala ena yaga kina ena noda cakacaka vakaitalatala.
3. Na cava meda cakava nida vakavakarau ina itavi ena caka kina na veitarotarogi?
3 Veitarotarogi: Qo ena vakayacori me vaka na vuli Vale ni Vakatawa, ena lekaleka ga na ikaunivosa kei na kena itinitini. Makataka na tikina bibi ena parakaravu yadua, qai tu vakarau me dua nomu ivakamacala lekaleka momona.
4. Meda vakavakarau vakacava ena itavi eda okati tale ga kina na vakarorogo?
4 Mera Vakaitavi na Vakarorogo: Ena vosa se vunau o koya e vakaitavi, ia so na gauna ena kerea mera vakaitavi na vakarorogo. Eda na sauma rawa na taro e tarogi ke da makataka na tikina bibi, da wilika tale ga na tikinivolatabu era lavetaki. Ena raica na tacida e nona na itavi qo mera vakaitavi na vakarorogo ena vakamacalataki ni veitikina bibi.
5. Na cava meda cakava me yaga kina vakalevu na vakatasuasua?
5 Vakatasuasua: Eso na itavi ena okati kina na vakatasuasuataki ni ka e yaco dina, me vakaraitaki kina se rawa ni vakayagataki vakacava ena yalava na tikina e veivosakitaki. Era na kerei na qase ni ivavakoso, dautukutuku matua se painia mera vakatasuasua. Noda vakavakarau ena rairai okati kina noda vakasamataka na iwalewale ni nona vakamacala o koya e vakatasuasua. Ni caka na vakatasuasua, meda vakasamataka na kena iwalewale eda na via muria, eda na veisautaka tale ga vakacava me ganiti ira na itaukeinivale. Nanuma meda kauta na ivola se mekesini ena vakayagataki ena vakatasuasua. Ena yaga me vakatovotovotaki eso na vakatutu ena bogi ni noda Sokalou Vakavuvale.
6. Na cava e bibi kina meda vakavakarau ina Soqoni ni Cakacaka?
6 Eda na marautaka vakalevu na Soqoni ni Cakacaka ke da vakavakarau, da qai vakasamataka rawa toka yani na veika totoka eda na lai vulica. Ena veivakayaloqaqataki vakalevu ke da dui cakava qori. (Roma 1:11, 12) Ke da dau vakavakarau vinaka, ena qai yaga vei keda na veika eda vulica ena Soqoni ni Cakacaka meda cakava vinaka kina noda ilesilesi.—2 Tim. 3:17.