iDusidusi Vei Ira Era Vakaitavi ena Soqoni ni Cakacaka
Ena itabataba ni Noda Cakacaka Vakaitalatala qo, e vakamatatataki kina na ituvatuva ni Soqoni ni Cakacaka. Na idusidusi kei na veivakadreti a tabaki ena Noda Cakacaka Vakaitalatala ni Me 2009 ena ulutaga “O na Vakavakarau Vakacava ina Soqoni ni Cakacaka,” e sa vakamatatataki qai veisau eso na ka ena Noda Cakacaka Vakaitalatala qo.
◼ Vosa: Qo e yavutaki ena ulutaga sa digitaki rawa tu, ia era na sega ni vakaitavi na vakarorogo. Me vakamacalataka na tacida e vakaitavi eke na veika e yaga vakalevu ena ivavakoso.
◼ Veitarotarogi: Ena caka na veitarotarogi me vaka na Vuli Vale ni Vakatawa, ena lekaleka ga na ikaunivosa kei na kena itinitini, qai tarogi na taro kece ni parakaravu. Me kua ni sivia na ivakamacala i koya e vakaitavi eke. Ke levu na gauna, ena rawa ni wiliki na tikinivolatabu ga e tokona na vakasama e veivosakitaki. Me kua ni wiliki na parakaravu, vakavo ke tukuni me wiliki.
◼ Mera Vakaitavi na Vakarorogo: Ena vosa na tacida e vakaitavi, ia ena so na gauna ena kerea mera vakaitavi na vakarorogo. Ena sega ni vosa tu ga o koya e vakaitavi, e sega tale ga ni vaka na veitarotarogi.
◼ Vakatasuasua—Vakatarogi: Ni tukuni na vakatasuasua e sega ni kena ibalebale me cakava ga na tacida e vakaitavi eke, ia me tuvanaka e dua me vakatasuasua. Mera vakatasuasua o ira era ivakaraitaki vinaka, era na vakatasuasuataka vinaka tale ga na veika e veivosakitaki. Me tuvanaka rawa o koya e vakaitavi na vakatasuasua, me kua nira qai lai kerei tu ga ni bera na soqoni. Ena vinaka mera kua ni vakayagataki na dautukutuku vou se o ira era se sega ni matua vakayalo me nanumi ni qo na sala era na vukei kina, ia eso era na rawa ni vakayagataki mera itaukeinivale. O ira na vakatasuasua mera raici ira na vakarorogo. Mera lai vakamacala mai na buturara o ira era vakatarogi, mera kua ni vakamacala ena vanua ga era dabe tiko kina. Me vakatovotovotaki rawa na vakatasuasua kei na vakatarogi. Ke sa lailai na gauna me vakalekalekataka na nona itavi na tacida, ia me caka ga na vakatasuasua se na vakatarogi. Ke via vakayagataka e dua na dautukutuku na dauveiqaravi ni ivavakoso, me qai taroga na kodineita ni ilawalawa qase se dua tale na qase ni ivavakoso.
Ke dua na itavi e sega ni okati ena kena sa vakamacalataki oti, me muri vinaka sara na kena idusidusi. Nira muria na idusidusi o ira era lesi ena itavi ni Soqoni ni Cakacaka, era sa tokona tiko me ‘rakorako, tuvanaki tale ga vakamatau’ na Soqoni ni Cakacaka.—1 Kor. 14:40.